Luka Modriç do të jetë lojtar i Reali të Madridit edhe gjatë sezonit të ardhshëm. Rinovimi i kontratës së tij është zyrtarizuar paraditen e kësaj të mërkure. Kroati, i cili do të mbushë 37 vjeç në shtator, ka firmosur marrëveshjen e re me klubin mëngjesin e sotëm, pasi ka marrë lejen nga federata e vendit të tij (Kroacia) për të lënë kampin stërvitor dhe për të bërë një udhëtim të shpejtë drejt Madridit për të vënë firmën në kontratë.
Ngjarja u zhvillua në Real Madrid City, në prani të presidentit Florentino Pérez. Numri 1 i klubit “merengues” i dhuroi Modricit fanellën tradicionale me emri i tij ku ishte fiksuar viti 2023.
Me kontratën e re Modriç do të bëjë 12 sezone me klubin mbretëror, çka do t’i japë mundësinë të arrijë 500 ndeshje si madridist (ai ka luajtur 436 ndeshje, lojtari i 20-të me më shumë ndeshje në historinë e klubit).
