Ministria e Mbrojtjes informoi sot mbi situatën nga zjarret në vend, ndërsa bëri të ditur se në 24 orët e fundit janë raportuar 27 vatra. Sipas të dhënave nga Qendra Kombëtare Operacionale e Emergjencave Civile në Agjencinë Kombëtare të Mbrojtjes Civile, pas një pune të pandërprerë të forcave operacionale në terren u bë i mundur izolimi i plotë dhe shuarja e 22 vatrave ndërsa pesë vatra janë aktive.
Mes tyre është ajo në Mirditë ku po ndiqet me përparësi nga forcat vendore të bashkisë Mirditë, në ndihmë të cilave kanë shkuar edhe një grup shërbimi nga MZSH Lezhë dhe 30 efektivë të FA me dy mjete zjarrfikëse.
Aktualisht po vijon puna për shuarjen e zjarreve në fshatin Shëngjin, bashkia Mirditë, ku flakët kanë përfshirë një sipërfaqe me pishë dhe shkurre. Terreni shumë i vështirë dhe era e fortë favorizojnë flakët që po kalojnë në drejtim të fshatit Lajthizë, njësia administrative Orosh.
Situata po ndiqet me përparësi nga forcat vendore të bashkisë Mirditë, në ndihmë të cilave kanë shkuar edhe një grup shërbimi nga MZSH Lezhë dhe 30 efektivë të FA me dy mjete zjarrfikëse.
Në monitorim është situata në vatrën midis fshatit Mal i Bardhë dhe Skuraj, njësia administrative Milot, bashkia Kurbin. Nuk ka rrezik për përhapje dhe për banesa.
Pa rrezik për banesat paraqitet edhe situata në vatrën e zjarrit në fshatin Surroj, njësia administrative Surroj, bashkia Kukës. Vatra ishte e izoliar, por u riaktivizua si pasojë e erës. Në terren po punonjnë forca të njësisë administrative dhe Shërbimi Pyjor.
Forcat operacionale janë duke punuar edhe në një tjetër vatër, ku ka patur riaktivizim të zjarrit si pasojë e erës, në fshatin Barrë, njësia administrative Arrën, bashkia Kukës. Zjarri nuk paraqet rrezik për banesat.
Në fshatin Frakth, njësia administrative Komsi, bashkia Mat, zjarri zhvillohet në një terren të thepisur shkëmbor, ku po digjen mbetje drusore në sipërfaqe pylli me ah. Situata është nën kontroll dhe nuk ka rrezik për përhapje.
