Përfshihet nga flakët landfilli pranë Inceneratorit të Elbasanit. Zjarri u shfaq mëngjesin e sotëm dhe i gjithë ekipi i zjarrfikëses së Elbasanit po punon për shuarjen e tij, shkaku i të cilit nuk dihet ende.
Që në prag të nisjes së sezonit veror, në muajin prill, ministri i Brendshëm, Taulant Balla kërkoi ndërhyrje energjike e të shpejtë në nivel inspektues në Shërbimin Zjarrfikës, për të parandaluar ngjarje me pasoja në të ardhmen dhe ruajtur jetën e pronën e qytetarëve.
Në vitin 2023 janë kryer 3,498 inspektime dhe diferenca me masat administrative është shumë e madhe, janë vendosur vetëm 42 masa. Nuk e besoj dot se ka kaq pak shkelje. Shoh dy mundësi: ose inspektimet janë selektive tek subjektet që nuk kanë probleme ose janë kryer pa analizuar problemet reale.
Ministri Balla theksoi rëndësinë kyçe të këtij shërbimi jetik për qytetarët dhe u shpreh:
Nëse nuk bëhet inspektimi në një ndërtesë dhe aty ndodh një fatkeqësi, janë kushtet e shpërdorimit të detyrës.
Ministri i Brendshëm, po ashtu apeloi për integritetin e inspektorëve të MZSH-së. Ndër të tjera, Balla kërkoi reformim total të Shërbimit Zjarrfikës, në nivelin inspektues në shkallë vendi.
Shërbimi zjarrfikës ka nevojë për uniformizim dhe përmirësim më të prekshëm si në Drejtorinë e Përgjithshme e gjithashtu në nivel vendor.
Vera është një stinë me problematika të zjarreve.
E di fare mirë që në një pjesë të bashkive nuk kemi flotën e duhur të mjeteve zjarrfikëseve, nuk janë punonjësit e duhur në disa njësi vendore të trajnuar në këtë shërbim, por drejtuesit vendorë duhet të kuptojnë se të punosh në këtë shërbim nuk është qokë, sepse rrezikon edhe vetë jetën e atij personi që është emëruar në atë detyrë që nuk ka njohuri.
Balla foli për ndryshim të menjëhershëm të situatës, referuar të dhënave të ofruara nga inspektimet për këtë vit.
Nuk duhet të ketë asnjë objekt me intensitet të madh publik si hotel, kinema, etj., pa u inspektuar, tha ministri i Brendshëm, i cili në ditët e para të vitit ka firmosur një urdhër që detyron MZSH-në të kryejë inspektime në çdo subjekt. Shqipëria kampione e turizmit në Ballkan, kërkon edhe një shërbim zjarrfikës kampion.