Liam Payne, ish-anëtar i grupit One Direction, ka humbur jetën në mënyrë tragjike në Buenos Aires, pas rënies nga ballkoni i hotelit ku qëndronte. Sipas raportimeve nga “The Guardian”, këngëtari 31-vjeçar ishte nën efektin e substancave të shumta, përfshirë kokainën dhe metamfetaminën, në momentin e incidentit.
Raportet paraprake toksikologjike kanë zbuluar praninë e një koktej droge të njohur si “kokaina rozë”, e cila përmban metamfetaminë, ketaminë dhe MDMA. Këto substanca iu gjetën gjatë një autopsie të pjesshme, së bashku me kokainë dhe benzodiazepinë. Rezultatet përfundimtare të analizave toksikologjike pritet të publikohen në javët në vijim.
Hetuesit kanë gjetur lëndë narkotike dhe alkool të shpërndarë në dhomën e tij të hotelit, si dhe mobile të thyera. Prokuroria e Argjentinës ka konfirmuar se Payne ka rënë nga ballkoni në një gjendje “gjysmë ose pavetëdije totale”. Kjo ngjarje tragjike ka shënuar një humbje të madhe për botën e muzikës dhe fansat e tij në mbarë botën.
