Giannis Antetokounmpo është padyshim ylli grek i sportit, me basketbollistin e talentuar që ka shkëlqyer vitet e fundit në NBA.
Ai tashmë pritet të hyjë në histori dhe për shtetin e tij, me mediat që zbulojnë se Giannis do të bëhet i pari atlet me ngjyrë që do të mbajë flamurin grek në paradën hapëse të flamurëve në Lojërat Olimpike “Paris 2024”.
Ekipi grek i basketbollit për meshkuj u kualifikua në Lojërat e tij të para Olimpike që nga viti 2008, pasi mundi Kroacinë përpara një turme vendase në Pire të dielën.
29-vjeçari, i cili u draftua nga Milwaukee Bucks në 2013 dhe i çoi ata drejt titullit të NBA-së në vitin 2021, ishte në lot pas ndeshjes.
“Është një ndjenjë e pabesueshme”, tha ai pas kualifikimit. “Që kur isha fëmijë kam dashur gjithmonë të luaj në Lojërat Olimpike”.
Rrugëtimi i tij për t’u bërë flamurtari olimpik i Greqisë nuk ka qenë i lehtë.
Prindërit e Antetokounmpo-s emigruan në Greqi nga Nigeria. Për 18 vitet e para të jetës së tij, Antetokounmpo nuk mund të udhëtonte jashtë Greqisë dhe në fakt ishte pa shtetësi, duke mos pasur asnjë dokument as nga Greqia as nga Nigeria. Atij iu dha shtetësia greke në maj 2013, më pak se dy muaj para draftit të NBA.
