Ai që u duk si një skeç i pafajshëm me nota humori nga ana e komedianit, Chris Rock dhe që në fillim u intepretua si i tillë nga të pranishmit e ata që ndoqën ceremoninë, u kthye në një incident të pakëndshëm, në një akt dhune. Will Smith, nuk e gëlltiti batutën për flokët e bashkëshortes, e cila vuan nga një sëmundje autoimune që shkakton rënien e tyre. Aktori iu drejtua skenës e nuk i rezistoi tundimit për t’i dhënë një shuplakë të fortë Rock kur ky i fundit po prezantonte fituesin për kategorinë e dokumentarëve.
Akademia po heton gjithçka që ndodhi për t’i dhënë aktorit dënimin e merituar, ndërsa familjarët kanë bërë me dije për “Entertainment Tonight” se po mendojnë që Will duhet të heqë dorë momentalisht nga aktrimi. Ata mendojnë se ai duhet të bëjë një pauzë, t’i japë pak kohë vetes pas asaj që ndodhi si dhe të shkojë në terapi. Vendimi i Smith nuk dihet ende, ndërsa sa i përket Jada-s, ajo ndihet e qetë dhe e ka lënë pas krahëve tashmë atë që ndodhi.
Disa nga projektet e ardhshme të aktorit të njohur Will Smith janë ndërprerë, pas incidentit aspak të zakontë që ndodhi mes tij dhe komedianit Chris Rock në skenën e ‘Oscars’. Pasi e goditi me shuplakë Chris, Will doli në skenë për të marrë çmimin e aktorit më të mirë për rolin e tij si Richard Williams në filmin, ‘King Richard’.
Aktori, i cili i bëri të gjithë të flasin dhe rrëmbeu vëmendjen më të madhe në ‘Oscars 2022’, ka një film në Netflix dhe një film për Sony, që janë vënë në pritje sipas ‘The Hollywood Reporter’. THR tha se:
Netflix ishte në procesin e gjetjes së një regjisori të ri për “Fast and Loose”, pasi David Leitch u tërhoq nga projekti përpara ndarjes së çmimeve të Akademisë.
Më 1 prill, rikujtojmë se Smith dha dorëheqjen nga Akademia e Arteve dhe Shkencave të Filmit. Nëpërmjet një deklarate ai tha se:
Lista e atyre që kam lënduar është e gjatë dhe përfshin Chris, familjen e tij, shumë nga miqtë dhe të dashurit e mi të zemrës, të gjithë të pranishmit dhe audiencën globale.
