Volkswagen ka përfunduar zyrtarisht prodhimin e makinës së saj ikonë “Polo” në Evropë. Me këtë, kompania është duke i dhënë fund një trashëgimie 40-vjeçare. Kjo lëvizje është pjesë e strategjisë më të gjerë të prodhuesit të automjeteve për të përshpejtuar tranzicionin e saj drejt automjeteve elektrike, në përputhje me tendencat globale. Polo, që u prezantua në vitin 1984, u bë një gur themeli i linjës së Volkswagen në Evropë, me mbi 8.4 milionë njësi të prodhuara në fabrikën e Pamplona në Spanjë.
I njohur për prakticitetin, përballueshmërinë dhe performancën solide, Polo gjeti vend tek blerësit evropianë për dekada. Megjithatë, ndërsa Volkswagen e zhvendos fokusin e tij tek elektrifikimi, objekti i Pamplona tani po rinovohet për të prodhuar dy automjete të reja të vogla elektrike. Gjiganti gjerman i makinave, ka mohuar raportin se po planifikon të largojë nga puna deri në 30,000 punonjës. “Ne nuk e konfirmojmë këtë shifër”-u citua të ketë thënë një zëdhënëse e Volkswagen, pas raporteve për shkurtimet e propozuara të vendeve të punës në revistën gjermane të biznesit Manager Magazin. “Një gjë është e qartë”-vazhdoi ajo.
“Volkswagen duhet të reduktojë kostot në vendndodhjet e tij gjermane. Kjo është mënyra e vetme që marka mund të fitojë para të mjaftueshme për investimet e ardhshme”. “E si e arrijmë këtë qëllim së bashku me përfaqësuesit e punonjësve është pjesë e bisedimeve të ardhshme”-përmbylli zëdhënësja. Kjo deklaratë vjen pasi Manager Magazin raportoi se prodhuesi i makinave po kërkonte të eliminonte vendet e punës në afat të mesëm.
Gjithashtu, përflitej se CEO Arno Antlitz po planifikonte të shkurtonte fondet për investime gjatë pesë viteve të ardhshme në 160 miliardë euro. Këto pretendime kanë shkaktuar zemërim në mesin e përfaqësuesve të punëtorëve dhe shqetësim në mesin e politikanëve gjermanë. Analistët në bankën e investimeve Jefferies kishin sugjeruar se VW po konsideronte mbylljen e dy deri në tre fabrikave, duke rrezikuar potencialisht dhe duke kërcënuar 15,000 vende pune.
