Ndërsa pas dy ditësh nis viti i ri shkollor 2024-2025, kryebashkiaku i Tiranës, Erion Veliaj e mbylli në shkollën 9-vjeçare “Misto Mame”, në Njësinë 8, turin e inspektimeve në shkollat e kryeqytetit. Veliaj tha se kjo është një nga shkollat me performancën më të lartë në Tiranë, ndërsa shtoi se të gjitha shkollat janë ndërtuar me të njëjtat standarde.
“Misto Mame” është një nga shkollat me performancën më të lartë në Tiranë. Ndonjëherë, nga mania për t’i çuar fëmijët në shkolla në qendër të Tiranës, harrojmë se ka super shkolla te “Medreseja”. Kjo është një shkollë e ndërtuar nga administrata e Tiranës më 2008-ën. E theksoj këtë, sepse vetëm dy administrata kanë bërë shkolla në Tiranë, administrata e Edi Ramës dhe administrata jonë, se për të tjerët e dimë që, mirë që nuk ndërtuan asnjë shkollë, por nuk të lënë as të punosh.
Veliaj shtoi se ashtu si në çdo godinë tjetër arsimore, edhe në shkollën “Misto Mame”, janë bërë të gjitha proceset e higjienës, sipas udhëzimeve të OBSH-së.
Më vjen mirë që i kemi zbatuar të gjitha procedurat e higjenës, dezinfektimin, dezinsektimin dhe deratizimin e shkollave, pavarësisht mitomanëve që dalin dhe bllokojnë makinat e punonjësve. Procesi është i bazuar në të gjitha udhëzimet e OBSH-së, të certifikuara nga BE-ja. Qëllimi ynë është që ta bëjmë punën saktë sepse prindërit na besojnë dritën e syrit.
Kryebashkiaku kishte edhe një apel për prindërit, që të hënën të mos e përdorin automjetin për të çuar fëmijët në shkollë, por të ecin bashkë me ta, për të shmangur krijimin e trafikut.
Dua ta përdor këtë mundësi për të bërë një apel për ditën e hënë kur fillon shkolla. E kanë bërë këtë apel Policia Bashkiake, Policia e Rrugore, Policia e Shtetit sepse është shumë, shumë e rëndësishme, sidomos në lagje të tilla kur tani ka edhe shkolla të reja në thuajse çdo lagje, se nuk ka sens t’i hipim makinës për të çuar fëmijët në shkollë. Ato 200-300 metra rrugë, këshilla për prindërit është: Merrini fëmijët për dore, flisni me ta, lehtësojini pak nga emocionet.
Nga 9 shtatori hyn në fuqi edhe udhëzimi i Kryetarit të Bashkisë së Tiranës që përcakton se mjetet e furnizimit të dyqaneve dhe marketeve nuk mund të qarkullojnë në orarin 07:00-09:00.
