Shqetësimet po shtohen në Spanjë për përhapjen e virusit të Nilit Perëndimor pas dy vdekjeve të tjera në Sevilje, duke e rritur numrin e përgjithshëm të vdekjeve nga virusi në rajon në pesë këtë verë. Sipas Ministrisë së Shëndetësisë 10 persona të tjerë vlerësohet të jenë të infektuar. Mushkonjat infektive janë gjetur në qytete pranë lumit Guadalquivir, duke përfshirë Coria del Río. Në fillim të këtij muaji, banorët e qytetit protestuan, duke i kërkuar qeverisë të marrë masa më efektive për të ndaluar infeksionin.
Sipas Organizatës Botërore të Shëndetësisë, 80% e të infektuarve mbeten asimptomatikë dhe është e rrallë që sëmundja të përparojë në një formë më të rëndë. Organizata thotë se individët mbi 50 vjeç dhe ata me sistem imunitar të dobësuar janë në rrezik më të lartë. Virusi është më i zakonshëm te zogjtë, por njerëzit dhe kafshët mund të infektohen edhe nga pickimi i mushkonjave.
Ekspertët rekomandojnë që banorët e zonave të prekura të mbrohen nga pickimi i mushkonjave duke përdorur ilaçe kundër insekteve, duke veshur këmisha dhe pantallona me mëngë të gjata dhe duke qëndruar në ambiente të mbyllura gjatë muzgut dhe agimit kur aktiviteti i mushkonjave është më i lartë.
Organizata Botërore e Shëndetësisë (OBSH) vlerëson se 135 milionë dollarë do të nevojiten për të luftuar sëmundjen virale mpox gjatë gjashtë muajve të ardhshëm. Kjo shifër nuk përfshin koston e 2 milionë dozave të vaksinës, sipas një dokumenti plani nga agjencia shëndetësore e Kombeve të Bashkuara në Gjenevë.
”Paratë do të investohen kryesisht në teste diagnostikuese dhe kërkime”-theksoi OBSH. “Për më tepër, masat për të parandaluar transmetimin nga kafshët te njerëzit dhe për të përfshirë komunitetet në luftën kundër mpox duhet të financohen sa më parë”-shpjegoi OBSH.
OBSH kohët e fundit kishte shpallur nivelin më të lartë të alarmit për shkak të epidemive mpox në Afrikë dhe një variant të ri, potencialisht më të rrezikshëm. Sipas OBSH-së, më shumë se 18 000 raste të dyshuara me 575 vdekje janë regjistruar tashmë në Republikën Demokratike të Kongos këtë vit.
