Një ngjarje e rëndë ka ndodhur në Novi Sad të Serbisë, ku një strukturë betoni ka rënë sipër qytetarëve në një stacion hekurudhor.
Sipas informacioneve të fundit nga vendi i ngjarjes, të paktën 14 persona kanë ndërruar jetë, siç raportojnë mediat serbe.
Shtatë automjete të emergjencës ndodhen në vendin e aksidentit, ndërsa ekipet e zjarrfikësve po përpiqen të arrijnë njerëzit nën rrënoja.
Edhe pse vetë stacioni u rinovua së fundmi, struktura e betonit e ndërtuar në vitin 1964 u shemb pak para orës 12:00.
Ndryshe, autoritetet serbe tashmë kanë nisur hetimet e para gjersa raportohet se një pjesë të stacionit e ka rinovuar një kompani kineze.
Së fundmi, në rrjet po qarkullojnë pamje të siguruara nga kamerat e sigurisë, të cilat kanë regjistruar momentin kur struktura e betonit shembet dhe bie sipër qytetarëve, disa prej të cilëve qëndronin ulur në stolat e stacionit.
Pamjet KETU.
Paraprakisht, Ministri i Punëve të Brendshme të Serbisë Ivica Daçiç tha se trupi i pajetë i 13-të është nxjerrë nga ngjarja e rëndë ku u shemb një pjesë e stacionit të trenit në Novi Sad dhe shtoi se nuk prisnin që të gjendeshin viktima të tjera.
“Kur patëm tetë viktima, e dinim se kishte edhe pesë persona të tjerë nën rrënoja, për të cilët nuk mundëm të vërtetonim nëse ishin gjallë apo të vdekur”, u tha Daçiç gazetarëve. Siç thotë ai, viktimat kishin plagë të shumta. “Ka qenë vdekje e menjëhershme”, ka thënë ministri serb.
Më parë Daçiç tha për “Pink”: “Operacioni i shpëtimit ka vazhduar gjatë gjithë pasdites dhe ai operacion ka nisur me një numër të papërcaktuar njerëzish që mund të ndodheshin nën rrënoja. Që në fillim dyshohej se numri i viktimave ishte i konsiderueshëm dhe se duke marrë parasysh peshën e tendës dhe strukturën, dihej se numri i të vdekurve ndoshta do të ishte më i madh se numri i të plagosurve”.
Ai shtoi se tre persona janë shpëtuar dhe janë në spital. Ndër të tjera janë shpëtuar edhe dy gra që ndodheshin nën rrënoja dhe me të cilat ka pasur kontakt. Daçiç tha se puna për shpëtuesit është e vështirë. “Këtu janë të pranishëm rreth 80 shpëtuesit tanë nga Departamenti i Situatave Emergjente, por ka edhe mekanizma, jo vetëm nga ministria jonë, por edhe nga kompanitë publike dhe private, për t’ju ardhur në ndihmë qytetarëve”, tha ai. Ai falënderoi stafin mjekësor dhe të gjitha shërbimet e qytetit për përpjekjet e tyre.
Daçiç më herët i tha Informer se kishte parë komandantin e njësisë së shpëtimit duke qarë, kur mësoi se një fëmijë gjashtë vjeçar kishte vdekur nën tendë. Ai theksoi se ende nuk ka listë përfundimtare apo listë identifikimi për viktimat e tragjedisë.
