Administrata e presidentit amerikan, Joe Biden po u bën thirrje njerëzve që të ushtrojnë kujdes në lidhje me COVID-19, duke theksuar rëndësinë e marrjes së vaksinave përforcuese për ata që kanë të drejtë dhe mbajtjen e maskave në ambiente të mbyllura, pasi dy variante të reja shumë të transmetueshme po përhapen me shpejtësi në të gjithë vendin.
Variantet e reja, të njohura si BA.4 dhe BA.5, janë degëzime të llojit Omicron që ka qenë përgjegjës për pothuajse të gjithë përhapjen e virusit në SHBA e rezultojnë edhe më ngjitës se paraardhësit e tyre. Mjekët e Shtëpisë së Bardhë theksuan rëndësinë e marrjes së dozave përforcuese, edhe nëse jeni infektuar kohët e fundit.
Dr. Rochelle Walensky, drejtore e Qendrave për Kontrollin dhe Parandalimin e Sëmundjeve:
Aktualisht, shumë amerikanë nuk janë të përditësuar në lidhje me vaksinat e tyre për COVID-19. Qëndrimi i përditësuar për vaksinat tuaja kundër COVID-19, ofron mbrojtjen më të mirë kundër rezultateve të rënda. Amerika ka parë një dyfishim të numrit të shtrimeve në spital për shkak të COVID-19 që nga prilli, duke reflektuar përhapjen e nënvarianteve të reja, me rreth 300 vdekje në ditë.
Dr.Anthony Fauci, eksperti më i lartë i sëmundjeve infektive në SHBA, deklaroi se ndërsa variantet e reja janë shqetësuese, me dozat përforcuese, me mbajtjen e maskës në ambiente të brendshme, vendi ka mjetet për t’i mbajtur larg efektit shkatërrues.
Nuk duhet ta lëmë të na prishë jetën, por nuk mund ta mohojmë se është një realitet, me të cilin duhet të merremi. Edhe nëse dikush së fundmi ka pasur COVID-19, duhet të marrë dozë përforcuese.
Sipas mjekëve, imuniteti zbehet, kështu që është thelbësore të qëndrojmë të përditësuar me vaksinat e COVID-it.
Nëse je mbi 50 vjeç dhe nuk e ke marrë dozë përforcuese këtë vit, duhet të shkosh ta marrësh një! Do të të shpëtojë jetën.
Rregullisht, Amerika po diskuton zgjerimin e përshtatshmërisë për një injeksion të dytë përforcues për të gjithë të rriturit, por ende nuk ka një vendim. Dy ditë më parë, edhe BE apeloi për doza përforcuese.
