Rritja e menjëhershme e temperaturave, është pasuar me shtim të urgjencave mjekësore. Drejtori i urgjencës kombëtare Skënder Brataj, bën me dije se thirrjet në drejtim të 127, janë rritur brenda 24 orëve të fundit.
“Kemi një rritje të numrit të konsulencave mjekësore. Sot vazhdon i njëjti ritëm janë shtuar rreth 50 vizita më shumë dhe jemi rreth 390”,-tha Skënder Brataj.
Më të rrezikuar nga episodet e të nxehtit janë fëmijët dhe të moshuarit, por ekspozimi për kohë të gjatë në diell, rriskon të gjitha grupmoshat.
Por si duhet vepruar në rastet e goditjeve nga dielli, të cilat rrezikojnë jetën.
Njësia e koordinimit të urgjencës kombëtare ofron gjatë gjithë kohës këshilla për qytetarët që kanë nevojë. Ajo çfarë mjekët kërkojnë në ditët me mot ekstrem, është shmangia e ekspozimit në diell, eleminim i konsumimit të kafesë, alkooli dhe pijeve energjike dhe konsumimin në sasi të mëdha të ujit.
