Supa është një nga ushqimet më të mira dhe të shëndetshme për organizmin. Duke qenë se ajo gatuhet me përbërës të shëndetshëm siç janë perimet, mishi i pulës dhe barishtet, ajo është e pasur me vitamina dhe minerale që i nevojiten imunitetit. Nutricionistët, rekomandojnë që konsumi i supave gjatë stinës së virozave dhe gripit të jetë sa më i lartë për të përshpejtuar shërimin.
Supa bimore është pakëz pikante dhe përbërësit e saj përzgjidhen në atë mënyrë që të luftojnë të gjitha problemet shëndetësore që sjell gripi dhe virozat. Hudhra mban larg sëmundjet. Konsumi i saj forcon imunitetin dhe parandalon ardhjen e gripit dhe virozave. Rigoni dhe trumza kanë efekt anti-bakterial dhe forcojnë imunitetin. Vaji esencial i rigonit është më efikasi kundër baktereve.
Kripa e detit ndihmon organizmin në parandalimin e dehidratimit. Speci djegës dhe xhenxhefili bëjnë mrekullira për zbutjen e fytit dhe largimin e infeksioneve nga bajamet. Përveç fytit, xhenxhefili dhe speci djegës qetësojnë edhe stomakun. Lëngu i limonit bashkëpunon me elektrolitet e kripës së detit dhe ruan pehazhin e organizmit.
Mjalti shërben si bartës i vitaminave dhe mineraleve dhe shumëfishon të mirat që ofrojnë të gjithë përbërësit e lartpërmendur për organizmin. Sasia e përbërësve përzgjidhet bazuar në numrin e personave për të cilët do gatuani. Ju nevojiten 2 filxhan çaji me lëng të mishit të pulës, 4 thelbinj hudhër, një majë luge çaji me spec djegës pluhur, dy feta 1 cm xhenxhefil i freskët i grirë hollë, një lugë çaji me kripë, 1 lugë çaji me rigon të thatë, 2 lugë çaji me mjaltë, gjysëm luge çaji me trumzë të thatë si dhe lëngu i një gjysmë limoni. Ziejini të gjithë përbërësit për 15 minuta dhe më pas kullojeni lëngun. Lëngun e përftuar rekomandohet ta konsumoni në drekë dhe në mbrëmje.