Ish-presidenti i Amerikës, Donald Trump, është arrestuar pak minuta më parë.
Por, nëse për një pjesë të mirë të opinionit publik ishte e papritur, vetë Trump ishte në dijeni të kësaj situate dhe kjo u vu re në përshëndetjen me grusht përballë kamerave, si për të përforcuar atë çka iu tha më herët mbështetësve të tij përmes emailit zyrtar “ne sot vajtojmë për humbjen e drejtësisë në Amerikë”.
Si postimi në rrjetet sociale rrugës për në gjykatë: “Uau, ata do të më arrestojnë”.
Ish-presidenti Donald Trump u largua më herët nga apartamenti i tij drejt gjykatës në Manhatan, ku do të njihet zyrtarisht me aktakuzën.
I rrethuar nga agjentë të shërbimit sekret dhe ekipi i tij ligjor, Donald Trump hyri në SUV-inë që e priste. Ish-presidenti përshëndeti me grusht teksa po dilte nga Trump Tower për të shkuar në gjykatë në momentet e fundit. Ai nuk tregoi asnjë shenjë nervozizmi, ndërsa hipi në makinën e tij për t’u nisur në qendër të qytetit.
Trump dhe shoqëruesit e tij po bëjnë rrugën nga rrokaqiejt në Avenue 5 në fundin e poshtëm të ishullit ku do të gjykohet.
Udhëtimi është pak më pak se katër milje, sakaq intinerarin mund ta shihni edhe në pamjet e mëposhtme.
Vlen të theksohet se kthimi i Trumpit në Manhatan, hap një kapitull të paprecedentë në historinë amerikane. Ai është ish-presidenti i parë që përballet me akuza penale ndërsa ndodhet në mesin e një fushate të tretë për Shtëpinë e Bardhë. Ish-presidenti ka përdorur këtë situatë për të mbledhur fonde, duke grumbulluar 7 milionë dollar që nga 18 marsi, ndërsa një sondazh i ri tregon një rritje të mbështetjes për të dhe një distancim të qartë nga rivali i mundshëm për nomimin republikan në Shtëpinë e Bardhë, Ron de Santis.
