Votuesit amerikanë kanë nisur të shkojnë në kutitë e votimit sot për të zgjedhur presidentin e tyre të ardhshëm.
Vitet e tjera, rezultatet e zgjedhjeve në SHBA janë deklaruar brenda disa orësh pas mbylljes së votimit, por gara e ngushtë e këtij viti mund të nënkuptojë një pritje më të gjatë.
Kur pritet të dalin rezultatet e zgjedhjeve presidenciale të 2024-s?
Në disa gara presidenciale në SHBA, fituesi është shpallur vonë gjatë natës së zgjedhjeve ose herët në mëngjesin e ditës së nesërme. Këtë herë, gara tepër e ngushtë në shumë shtete mund të çojë në pritje më gjatë për të shpallur fituesin.
Demokratja Kamala Harris, aktualisht nënkryetare e Shteteve të Bashkuara, dhe republikani Donald Trump, ish-president, kanë qenë në një garë shumë të ngushtë për javë të tëra.
Fitoret e ngushta mund të shkaktojnë gjithashtu rinumërime. Për shembull, në shtetin kyç të Pensilvanisë, një rinumërim i përgjithshëm do të kërkohej nëse diferenca midis votave të fituesit dhe humbësit është më pak se një e katërta e një përqindje. Në vitin 2020, ky margjin ishte vetëm pak mbi 1.1 përqind.
Sfidat ligjore janë gjithashtu të mundshme. Mbi 100 padi parazgjedhore janë depozituar tashmë, përfshirë sfida për vlefshmërinë e votuesve dhe menaxhimin e listave të votuesve, të ngritura nga republikanët.
Një tjetër skenar që mund të shkaktojë vonesa janë çrregullimet e mundshme lidhur me zgjedhjet, sidomos në vendvotime.
Nga ana tjetër, numërimi i votave është përshpejtuar në disa zona, përfshirë shtetin kyç të Miçiganit, dhe votat që do të jepen me postë pritet të jenë shumë më të pakta krahasuar me zgjedhjet e kaluara, që u mbajtën gjatë pandemisë Covid.
Kur janë shpallur rezultatet e zgjedhjeve të mëparshme presidenciale?
Zgjedhjet e vitit 2020 u zhvilluan të martën më 3 nëntor. Megjithatë, rrjetet televizive amerikane nuk e shpallën fitues Joe Biden deri në orët e vona të mëngjesit të së shtunës më 7 nëntor, pasi rezultati në Pensilvani u bë më i qartë.
Në zgjedhjet e tjera të fundit, votuesit kanë pasur një pritje shumë më të shkurtër.
Në vitin 2016, kur Trump fitoi presidencën, ai u shpall fitues një ditë pas zgjedhjeve.
Në vitin 2012, kur Barack Obama siguroi një mandat të dytë, fitorja e tij u projektua para mesnatës së ditës së votimit.
Megjithatë, zgjedhjet e vitit 2000 midis George W Bush dhe Al Gore ishin një përjashtim i dukshëm.
Votimi u mbajt më 7 nëntor, por të dy fushatat shkuan në luftë për një garë të ngushtë në Florida dhe gara nuk u vendos deri më 12 dhjetor. Gjykata e Lartë e SHBA votoi për t’i dhënë fund procesit të rinumërimit të shtetit, i cili e mbajti Bushin në vend si fitues dhe i dorëzoi atij Shtëpinë e Bardhë, shkruan CNN.
Top Albania Radio, sonte në orën 21:00, do të përcjellë të gjitha detajet, hap pas hapi, në programin: “Nata e Zgjedhjeve në SHBA”.
Përballje e ashpër midis Kamala Harris dhe Donald Trump! Me analiza të thelluara, rezultate të exit polleve, e intervista ekskluzive direkt nga SHBA!
Zgjedhjet Presidenciale të SHBA, sonte në 21:00. Live – për çdo moment vendimtar! Me Blendi Salaj!
