Kryebashkiaku i Shkodrës Benet Beci ka reaguar për ngjarjen e rëndë, ku dyshohet se nëna me tre fëmijët e mitur është mbytur në lumin Buna, si pasojë e dhunës së ushtruar nga bashkëshorti.
Beci inkurajon trupat speciale në gjetjen sa më parë të trupave të nënës dhe dy fëmijëve, që dyshohet se janë mbytur, si dhe institucionet përkatëse për dhënien e një versioni zyrtar për rastin dhe dënimin e kujtdo që ka nxitur gruan në ndërmarrjen e këtij akti të rëndë.
“Shkodra, por edhe gjithë opinioni publik ndihen sot të tronditur nga humbja tragjike e një nëne dhe tre fëmijëve të saj.
Inkurajoj trupat speciale të bëjnë të mundur gjetjen e trupave sa më shpejt dhe institucionet përkatëse në dhënien e versionit zyrtar e dënimit të kujtdo që nxiti një veprim të tillë”, shkruan Beci.
Trupi i vajzës së saj 9-vjeçare u gjet në orët e para të mëngjesit të sotëm në lumin Buna, nga një peshkatar i zonës.
Edhe Ministrja e Shtetit për Marrëdhëniet me Parlamentin, Elisa Spiropali ka reaguar e tronditur për ngjarjen e rëndë që ka ndodhur në Shkodër ku Alma Arrazi u hodh në lumin Buna bashkë me tre fëmijët e saj, pasi përpos dhunës mësoi se edhe tradhtohej nga bashkëshorti Erdgys Arrazi.
“Thellësisht e tronditur dhe pafundsisht e trishtuar për humbjen e katër jetëve të pafajshme në ujërat e Bunës. Tre ëngjëjt dhe nëna e tyre kanë humbur jetën në mënyrën më makabre. Dyshimet janë se dhuna e bashkëshortit dhe babait të familjes i ka çuar drejt vdekjes. Fenomeni i tmerrshëm i dhunës ndaj grave që plagos shoqërinë dhe shtetin tonë, duhet të ndalet me çdo kusht dhe me çdo çmim. Lufta ndaj kësaj dhune që merr dhe sakaton jetë grash dhe fëmijësh, duhet të ngrihet në nivelin e emergjencës kombëtare.
Duhet të zgjohemi të gjithë si njerëz, si shoqëri e si shtet. Të çohemi të gjithë kundër këtij fenomeni primitiv, sepse secila jetë është e çmuar dhe nuk mund t’i dorëzohet dhunës së verbër. Organet ligjzbatuese dhe sistemi i drejtësisë duhet të jenë vigjilentë dhe të pamëshirshëm ndaj çdo sinjali, informacioni, denoncimi apo gjykimi për raste të tilla. Drita e diellit nuk duhet të jetë privilegj për ata që dritën e jetës ua heqin çdo ditë viktimave të tyre. Sistemi ynë arsimor, media, politika, të gjithë duhet të bejnë më shumë për të ruajtur dhe lartësuar dinjitetin e grave, dhe jo të lejojnë të trajtohen lehtësisht si njerëz të dorës së dytë me gjuhë diskriminuese e seksiste, që brymos patriarkalizmin e sëmurë që ushqen dhunën”, shtoi ajo.
