Së fundmi ministri italian i Kulturës, Gennaro Sangiuliano i kërkoi falje gruas së tij dhe kryeministres Giorgia Meloni për situatën që shkaktoi. E kemi fjalën për zbulimin e lidhjes së tij të fshehtë me një influencer të mediave sociale, të cilin e propozoi për një rol të lartë këshillues.
Në një intervistë me transmetuesin publik RAI të mërkurën, Sangiuliano tha se kishte dorëzuar dorëheqjen e tij, por Meloni e refuzoi atë.
“Kryeministrja më tha që të shkoj përpara dhe të sqaroj menjëherë të vërtetën. Ajo më tha: “Ji gjithmonë e sinqertë dhe thuaj gjithmonë të vërtetën”.
Sangiuliano, një politikan i martuar 62-vjeçar, pranoi se ishte me influencer-en e mediave sociale, Maria Rosaria Boccia, 41 vjeç, të cilën e propozoi për rolin e këshilltares së lartë, por theksoi se roli i Boccia-s si këshilltare për ngjarjet e mëdha nuk u finalizua kurrë dhe që atëherë u revokua për shkak të marrëdhënies së tyre.
Ai këmbënguli gjithashtu se për këtë aferë nuk është shpenzuar asnjë euro e tatimpaguesit italian dhe nuk ka qarkulluar asnjë dokument konfidencial apo i klasifikuar për aktivitete të ndjeshme, duke deklaruar se ka prova për të mbështetur pretendimet e tij. I pyetur nga gazetari i RAI-t që e intervistoi nëse do të kërkonte falje, Sangiuliano u përgjigj me një listë:
“Shikoni, personi i parë që duhet t’i kërkoj falje sepse është e jashtëzakonshme, është gruaja ime (gazetarja Federica Corsini). Më pas i kërkoj falje Giorgia Melonit, e cila më besoi, për sikletin që i shkaktova asaj dhe padyshim qeverisë”, shtoi ai.
“Kërkoj falje edhe për bashkëpunëtorët e mi, të cilët në mënyrë të pahijshme, edhe pse nuk kanë bërë asgjë, e kanë gjetur veten të investuar në këtë aferë”.
