Platforma e mediave sociale TikTok po pushon qindra punonjës nga puna, duke përfshirë një numër të madh të stafit në Malajzi, pasi ajo po zhvendos fokusin drejt një përdorimi më të madh të AI në monitorimin e përmbajtjes. Dy burime të njohura me këtë çështje thanë se më shumë se 700 vende pune u shkurtuan në Malajzi. TikTok, në pronësi të ByteDance të Kinës, më vonë sqaroi se më pak se 500 punonjës në vend u prekën. Bëhet e ditur se punonjësit, shumica e të cilëve ishin të përfshirë në operacionet e monitorimit të përmbajtjes, u informuan për shkarkimin e tyre me email.
TikTok konfirmoi pushimet nga puna dhe tha se disa qindra punonjës pritej të ndikoheshin globalisht si pjesë e një plani më të gjerë për të përmirësuar operacionet e tij të moderimit. Siç raportohet, TikTok përdor një përzierje të zbulimit të automatizuar dhe monitorues njerëzorë për të shqyrtuar përmbajtjen e postuar në faqe. ByteDance ka mbi 110,000 punonjës në më shumë se 200 qytete në mbarë botën.
Kompania po planifikon gjithashtu shkurtime të tjera muajin e ardhshëm pasi duket të konsolidojë disa nga operacionet e saj rajonale. “Ne po i bëjmë këto ndryshime si pjesë e përpjekjeve tona të vazhdueshme për të forcuar më tej modelin tonë global të funksionimit për monitorimin e përmbajtjes”-tha një zëdhënës i TikTok. Shkurtimet e vendeve të punës ndodhin pasi kompanitë e teknologjisë përballen me presion më të madh rregullator në Malajzi, ku qeveria u ka kërkuar operatorëve që të aplikojnë për një licencë deri në janar, si pjesë e një përpjekjeje për të luftuar shkeljet kibernetike.
Malajzia raportoi një rritje të mprehtë të përmbajtjes së dëmshme në rrjete sociale në fillim të këtij viti dhe u kërkoi kompanive, përfshirë TikTok, që të rrisin monitorimin në platformat e tyre. Rikujtojmë, se bashkëpunimi i Autoritetit të Mediave Audiovizive me TikTok-un për raportimin e përmbajtjeve të rrezikshme në platformën online, është shtrirë edhe më tej me sjelljen e përfaqësuesve TikTok në Tiranë. Nisma më e re e prezantuar si “agjenda e sigurisë digjitale të TIK TOK në Ballkanin Perëndimor”, bëri bashkë edhe rregullatorët e rajonit dhe CRCA.
