Pavarësisht gamës së mënyrave të komunikimit, me telefon, me mesazhe, me WhatsApp, etj, emaili mbetet forma klasike e bisedave sidomos për çështje pune. Ndryshimet në menaxhimit të postës elektronike duket se kanë nxitur jo pak debate te njerëzit, sidomos te dikush që ka qindra emaile të palexuara.
Një numër i madh emailesh të palexuara shkakton ankth, ndërsa të tjerë përpiqen të jenë përzgjedhës në ato që vlejnë të hapen apo ato që duhet të fshihen. Vlen të theksohet se truri ynë nuk funksionon në të njëjtën mënyrë tek të gjithë.
Për disa, një email pa mesazhe shkakton më shumë stres se sa injorimi i emaileve. Në studimin në “Harvard Business Review” theksohet se:
“Nga tetë orë që menaxherët i kushtojnë komunikimeve elektronike çdo javë, ne vlerësojmë se 25% e asaj kohe harxhohet duke lexuar emailet që nuk duhet të dërgohen dhe 25% shpenzohet duke iu përgjigjur atyre.”
Ta mendoni që kjo vlen vetëm për emailet e punës, por ndërkohë ju mund të keni komunikim me njerëz të afërt, mund të prisni një përgjigje nga një ambasadë etj.
Sipas psikologut Larry Rosen që foli për “Business Insider”, njerëzit që dërgojnë dhe fshijnë në mënyrë të vazhdueshme emailet shpesh përpiqen të shmangin ankthin që vjen bashkë me to.
“Një email me mesazhe të pahapura çliron neurotransmetues të bazuar në stres, si kortizoli, diçka që i bën ata të ndihen të shqetësuar,”-tha ai.
Një pjesë e këtij ankthi mund të rrjedhë nga perfeksionizmi ose anasjelltas dhe shikimi i njoftimeve të grumbulluara është një kujtesë e gjithçkaje që nuk po bëni ose nuk jeni në gjendje ta bëni.
“Kjo mund të lidhet edhe me ndjenjën e mbingarkesës deri në pikën që çdo email i palexuar është një detyrë tjetër e mbledhur mbi shumë të tjera,”-tha psikologia Jenn Hardy.
Rosen u shpreh për “Business Insider” se njerëzit që qëndrojnë gjithë kohës duke parë email-et janë shpesh njerëz me një nevojë të madhe për kontroll në jetën e tyre.
“Ata kanë nevojë për një mënyrë të jashtme për të pasur kontroll mbi botën,”-tha ai. Nga ana tjetër, personat që kanë një postë elektronike plot me emaile të pahapura janë njerëz që ndiejnë një lloj stresi. Ideja për të menaxhuar gjithçka thjesht u krijon ankth dhe ata ndihen rehat duke i injoruar. Ndërsa, për personat që kanë 0 emaile, ka një ndjenjë të lartë kontrolli dhe menaxhimi që ata nuk ia besojnë rastësisë, por thjesht përkushtimit të tyre.
