Mospirja e një gote të madhe vere, një litri birre ose mosngrënia e një çokollate nga dieta e britanikëve mbipeshë do të përgjysmonte nivelin e obezitetit, thonë ekspertët. Mbretëria e Bashkuar është në mbërthimet e një krize të madhe obeziteti, me dy në tre të rritur që janë mbipeshë, që i kushton “National Health Service” 6 miliardë paund çdo vit. Reduktimi i pak më shumë se 200 kalorive nga dieta mesatare e britanikëve me mbipeshë mund të përgjysmojë normat e obezitetit, sipas analizës nga “Nesta”, e cila e quan veten një agjenci inovacioni për të mirën sociale.
Kjo shifër barazohet me rreth një gotë të madhe verë (227 kalori), një litër birrë (182) ose 500 ml Coca-Cola (210). “Nesta” po bën fushatë për të përgjysmuar prevalencën e obezitetit deri në vitin 2030, duke i ulur nivelet në ato të fillimit të viteve 1990 (14 për qind). Për krahasim, 28 për qind e britanikëve kanë një BMI mbi 30 tani. Shkencëtarja e të dhënave Elena Mariani dhe ekipi llogaritën se sa kalori do të duhej të shkurtonin britanikët mbipeshë për të ulur nivelet e obezitetit në ato të tre dekadave më parë.
Analiza përdori një model ‘standard ari’ të mbështetur nga qeveria që vlerëson humbjen e peshës në përgjigje të reduktimit të kalorive. Rezultatet treguan se njerëzit do të duhet të shkurtojnë 216 kalori në ditë, mesatarisht. Shifra është në përputhje me prerjen e një fete torte me çokollatë (230), tre pako patatina (213) ose katër copa proshute (230). Për meshkujt, shifra ishte 241 kalori, ndërsa femrat do të duhej të shkurtonin 190 kalori që barazohet me një reduktim prej rreth 8.5 për qind.
Por ekipi u bëri thirrje njerëzve që të mos i përdorin këto shifra për të vendosur objektiva individuale të reduktimit të kalorive. Në vend të kësaj, duhet të ketë ndërhyrje në nivel popullsie për të riformuluar ushqimin, për të reduktuar reklamat e ushqimeve të padëshiruara dhe për të zhvendosur promovimet drejt ushqimeve më të shëndetshme, thanë ata.
