Së fundmi disa përdorues të mediave sociale besojnë se “The Simpsons” kanë parashikuar rikandidimin e Donald Trump për postin e presidentit të Shteteve të Bashkuara të Amerikës. Producenti i serialit “The Simpsons”, Al Jean, ka postuar në profilin e tij në Twitter një fotografi nga një episod i transmetuar në vitin 2015. Ai përmban Homer Simpson dhe një shenjë ‘Trump 2024’.
.@TheSimpsons As predicted in 2015 pic.twitter.com/BQEbCXAyy2
— Al Jean (@AlJean) November 16, 2022
Është fjala për episodin “Trumptasic Voyage”, në të cilin Homeri nis një udhëtim ‘të pazakontë’ pas një “takimi me një parukë të Donald Trump”. “Si i parashikojnë gjërat The Simpsons? Kjo ka filluar të më trembë”, shkroi një përdorues në Twitter. “Asgjë nuk është rastësi”, shtoi një tjetër. Ndërsa edhe vet producenti Al Jean në postimin e tij ka shkruar: “Siç parashikuan ‘The Simpsons’ në vitin 2015”.
Rikujtojmë, se ditën e djeshme Trump ka shpallur zyrtarisht rikandidimin e tij për postin e presidentit të Shteteve të Bashkuara të Amerikës. “Rikthimi i Amerikës fillon pikërisht tani”, u tha Trump mbështetësve në resortin e tij, Mar-A-Lago, në Florida. Njoftimi vjen një javë pas zgjedhjeve të mesmandatit në SHBA, të cilat përcaktojnë përbërjen e Dhomës së Përfaqësuesve dhe të Senatit Amerikan. Partia Republikane e Trumpit doli më keq seç pritej në këto zgjedhje dhe shumë prej kandidatëve që ai mbështeti, nuk arritën të fitonin.
