Fjalimet në Kuvend apo komisionet ndërparlamentare do të zbardhen me anë të Inteligjencës Artificiale.
Në një tender 75 mln lekësh të shpallur nga vetë Kuvendi, parashikohet transkriptimi automatik i fjalimeve, me ndihmën e sistemit inteligjent.
“Zbatimi i një sistemi inteligjent transkriptimi dhe shënimet e të dhënave do të lejojnë Kuvendin e Shqipërisë të transkriptojë automatikisht seancat plenare, takimet e komisioneve, të agregojë, shënojë dhe grupojë regjistrimet e folësve, gjë që do të përparojë agjendën e forcimit të transparencës legjislative përmes Teknologjisë së Informacionit, por jo vetëm. Një sistem si ky do të bënte të mundur sfidën për një parlament digjital dhe do të siguronte rritjen e produktivitetit, transparencën e plotë në kohë reale, si edhe dhe do të mundësonte analizë të sintetizuar të punës së organeve të Kuvendit, siç është rekomanduar nga projektet e mëparshme të IPA-s”, thuhet në aneksin e tenderit.
Aty argumentohet se gjatë ditës prodhohet mesatarisht 10 orë audio në ditë dhe është e pamundur për ekipin e redaktorëve të Kuvendit, ku punojnë 20 persona, t’i zbardhin ato, pasi ka disa zhvillime paralelisht.
Tenderi përfshin blerjen e sistemit të transkriptimit të të dhënave audio-video dhe mirëmbajtjen e tyre.
Kompanitë e interesuara për këtë shërbim, kanë vetëm një muaj kohë për paraqitjen e ofertave sipas kushteve të parashikuara.
