Plakja është një proces natyror i njeriut dhe përkundër faktit se me kalimin e kohës shumë prej nesh kanë gjithnjë e më shumë frikë nga shuarja e qirinjve në tortën e ditëlindjes, shkencëtarët kanë zbuluar se plakja është e gjitha psikologjike dhe nuk ka të bëjë me mënyrën se si dukemi në pasqyrë, por si ndihemi nga brenda. Të ndihesh më i ri sjell përfitime shëndetësore dhe mund t’ju ndihmojë të jetoni më gjatë. Studime të ndryshme janë këtu për t’ju vërtetuar se gjithçka ka të bëjë me atë se si ndiheni dhe pavarësisht nga mosha juaj, ju mund të qëndroni gjithmonë të rinj.
Të ndihesh më i ri apo më i vjetër mund të thotë shumë për personalitetin e dikujt. Mosha e perceptuar nga individi dhe jo numri aktual njihet si “mosha subjektive” dhe sipas psikologëve Weiss dhe Lang, ne e përqafojmë këtë moshë si një mënyrë për të përballuar stresin e plakjes. Studimet kanë treguar se njerëzit me një moshë më të ulët subjektive janë më ekstrovertë dhe të hapur ndaj përvojave të reja në dallim nga pjesa tjetër e popullsisë. Megjithatë, të kesh një shpirt më të ri nuk është sinonim i papjekurisë. Njerëzit fitojnë mençuri përmes përvojave të jetës, ndryshimi është se ata u përgjigjen situatave nga një këndvështrim tjetër pozitiv.
Gjatë adoleshencës, shumica prej nesh kanë dëshirë të plaken më shpejt. Por e vërteta është se në moshën 30-vjeçare, rreth 70% prej nesh fillojnë të ulin moshën subjektive. Psikologia Anna Kornadt zbuloi gjithashtu se ne ndihemi ndryshe në aspekte të ndryshme të jetës sonë. Kur bëhet fjalë për tema si financat, të cilat janë të lidhura stereotipisht me një konotacion negativ, njerëzit priren të reagojnë sikur të ishin më të rinj si një mënyrë për të distancuar veten nga grupmosha e tyre aktuale. Përshembull, të thuash se je 45-vjeç në moshën 50 vjeçare mund të jetë një mënyrë për të shprehur më shumë vetëkontroll dhe më pak shqetësim për performancën e punës.
Kjo ndjenjë e rinisë vepron si vetëmbrojtje, duke na dhënë, nga ana tjetër, një pamje më optimiste për planet e ardhshme, si dhe përfitimet shëndetësore. Sa më i ri të ndiheni, aq më shumë kuptoni mirëqenien. Një studim i publikuar nga Shoqata Psikologjike Amerikane shpjegon se sa më e re mosha subjektive, aq më i ulët është niveli i stresit. Mund të nënkuptojë funksionim më të mirë njohës, më pak inflamacion të shkaktuar nga stresi, një rrezik më të ulët të shtrimit në spital për shkak të një sëmundjeje dhe një jetë më të gjatë në dallim nga ata që ndihen më të moshuar.
Mund të ndihmojë në parandalimin e depresionit.
Ne kemi diskutuar se si nivelet e stresit ulen proporcionalisht me zvogëlimin e moshës subjektive dhe me këtë, duket gjithashtu se ka një rrezik më të ulët të depresionit. Universiteti i Montpellier-it gjurmoi të dhënat e më shumë se 17,000 njerëzve të moshës së mesme dhe të moshuar me faktorë të ndryshëm demografikë. Shumica e pjesëmarrësve ndiheshin 8 vjet më të rinj se mosha e tyre aktuale. Pjesa tjetër e tyre që mendonin se ishin plakur më shpejt, rreth 8 deri në 13 vjet më shumë, kishin një rrezik 18%-25% më të madh për të vuajtur nga një sëmundje ose depresion.
Mendërisht më i ri, fizikisht më i fortë.
Ju ndoshta mbani mend si fëmijë se sa orë mund të qëndronit duke vrapuar nëpër shtëpi ose duke luajtur lojëra pa u lodhur. Dhe me kalimin e kohës, aktivitetet fizike u bënë disi të lodhshme. Një sekret tjetër i moshës subjektive është se ajo parashikon edhe modelet e aktivitetit fizik. Të ndihesh më i ri mund të rezultojë në kënaqësi edhe më të madhe të aktiviteteve fizike, të tilla si ushtrimet, mësimi i një hobi të ri, udhëtimi, kërcimi dhe lëvizja në përgjithësi. Do të keni më shumë kohë për të shijuar gjithçka që ju bën të ndiheni të lumtur si fëmijë.
Njerëzit që ndihen më të rinj mund të imagjinojnë një të ardhme më të ndritshme.
Trupi realizon atë që mendja beson dhe mekanizmi subjektiv i plakjes mund të shkojë në të dyja drejtimet, aq sa dëshiron personi. Nëse ndiheni të pambrojtur ose të harruar, ka një shans më të madh për t’u ndjerë më i vjetër dhe për rrjedhojë, me shëndet më të dobët.
