Mëngjesin e sotëm, kryeministri Edi Rama ndau në rrjetet sociale një fragment të fjalës së tij nga takimi i mbajtur me shqiptarët në Nju Jork të SHBA-ve.
Me këtë mesazh nga takimi i djeshëm në New York, përcjell dhe falenderimet më të ndjera të gjithë pjesëmarrësve në takim për mikpritjen e tyre vëllazërore.
Në mesazhin e tij, shefi i qeverisë thekson se “progresi i bërë nga Shqipëria drejt anëtarësimit në Bashkimin Europian ende është në rrezik”, ndaj shqiptarëve në Shtetet e Bashkuara të Amerikës iu kërkoi “të bashkohen e të kontribuojnë përmes votës së tyre, për ta shtyrë vendin tonë përpara edhe në kilometrin e fundit drejt anëtarësimit të plotë në Bashkimin Europian”.
Shqipëria ka bërë progres të jashtëzakonshëm por është akoma një progres në rrezik nëse të gjithë së bashku nuk e shtyjmë përpara në këtë kilometër të fundit për ta bërë anëtare të Bashkimit Europian.
Kryeministri Rama, njëkohësisht kryetar i Partisë Socialiste, shton se shqiptarët e Diasporës duhet “të bëhen garantë që vendi ynë të mos kthehet më pas”.
Një nga arsyet e suksesit tuaj, mesa kam kuptuar, është që shqiptarët këtu kanë ndihmuar shqiptarët, që kush ka ardhur përpara ka ndihmuar ata që kanë ardhur më mbrapa dhe prandaj Diaspora sot, prandaj shqiptarët jashtë atdheut sot duhet të luajnë për Shqipërinë atë rol që kanë luajtur ata shqiptarë këtu që kanë ndihmuar shqiptarët që kanë ardhur dhe duhet të bëhen garantë me pjesëmarrjen e tyre në zgjedhje, duhet të bëhen garantët që Shqipëria nuk kthehet më mbrapa.
E prandaj kam ardhur këtu, për t’ju kërkuar që ta vazhdojmë dhe ta përmbushim së bashku këtë mision të nisur një dekadë më parë, për ta ngjitur Shqipërinë në majën e 2030-ës duke e bërë përfundimisht të pakthyeshme rrugën drejt Europës dhe duke bërë për vendin tonë, për shtetin tonë, për flamurin tonë, atë që çdo shqiptar si ju në Amerikë apo Europë ka bërë për veten e tij, për familjen, për të ardhmen e fëmijëve të vet duke u bërë pjesë krenare e pandashme e bashkësisë ku sot jeton dhe punon këtu në Amerikë apo matanë oqeanit në Europë.
