Në qytetin Dnipro të Ukrainës, sulmet raketore ruse lanë të vrarë tre persona, mes tyre një fëmijë. 19 vetë u plagosën dhe u shkatërruan disa ndërtesa, siç njoftoi Sergiy Lysak, guvernator i rajonit të Dnipropetrovskut.
Edhe mes të lënduarve ka fëmijë. Tetë persona u shtruan në spital.
U sulmua edhe kryeqyteti ukrainas, Kiev. U vranë dy persona, një adoleshent dhe një tjetër person. Qytetet ukrainase, përfshirë Kievin, janë objektiv i sulmeve me dronë dhe raketa që nga koha kur Rusia nisi pushtimin në shkallë të plotë të Ukrainës, në muajin shkurt të vitit 2022.
Më herët në fillim të javës, sekretari amerikan i Mbrojtjes, Lloyd Austin, njoftoi ndarjen e një pakete ndihme ushtarake prej 400 milion dollarësh për Ukrainën.
Paketa do t’u sigurojë forcave tuaja municione shtesë, automjete të blinduara e armë antitank.
Vizita e tij në Kiev erdhi disa orë pas një sulmi me dronë rusë në kryeqytetin ukrainas dhe teksa presidenti Zelensky u kërkon partnerëve perëndimorë të vazhdojnë të ofrojnë mbështetje ushtarake për luftën. Ukraina po has në vështirësi për ta frenuar fushatën e egër ruse përgjatë frontit lindor, që gradualisht po i detyron forcat e Kievit të heqin dorë nga një sërë qytetesh e fshatrash.
Në një tjetër zhvillim, raportohet se është ndalur ndërtimi i një kampi të ri ushtarak në rajonin Homel të Bjellorusisë, për të cilin disa analistë kishin paralajmëruar se mund të përdorej si bazë sulmuese ndaj Ukrainës. Shërbimi bjellorus i Radios Evropa e Lirë, duke përdorur burime lokale e imazhe satelitore, raportoi se puna në “Chaika”, dikur kamp pushimesh për fëmijët në epokën e komunizmit u pezullua pa ndonjë arsye. Ky kamp ndodhet vetëm 40 kilometra larg kufirit me Ukrainën.
Sipas planeve të qeverisë bjelloruse, projekti do të financohej nga programi shtetëror për investime dhe pritej që të përfundonte në vitin 2027. Në fillim të këtij viti, ky vend ishte mbushur me mjete ndërtimi. Nga 10 tetori, imazhet satelitore tregojnë se në këtë vend nuk ka objekte të reja. Rusia e përdori Bjellorusinë si platformë për të nisur pushtimin e plotë të Ukrainës, por Minsku thotë se nuk i ka lejuar forcat bjelloruse të marrin pjesë në këtë konflikt.
