Suedia ka bërë histori si vendi i parë në botë që shpallet zyrtarisht “pa tym”, duke arritur këtë qëllim 16 vjet përpara objektivit të Bashkimit Evropian.
Sipas të dhënave të fundit të publikuara nga agjencia suedeze e shëndetit publik, vetëm 4.5% e personave mbi 16 vjeç të lindur në Suedi pinë duhan, një përqindje shumë më e ulët se niveli global prej 5%, i cili tregon një shoqëri “pa tym”.
Kjo arritje është produkt i një qasjeje “pioniere” në politikat për reduktimin e dëmit, të cilat kanë udhëhequr Suedinë drejt suksesit në kontrollin e duhanit. Dr. Delon Human, drejtues i Smoke Free Sweden, theksoi se ky është një moment i rëndësishëm për shëndetin publik global. Ai theksoi se Suedia ka përdorur produktet alternative të nikotinës, si snus-i dhe produktet me ngrohje, për të ofruar mundësi më të sigurta për përdoruesit e duhanit, duke ulur kështu rrezikun për shëndetin.
Statistikat e fundit gjithashtu tregojnë se 5.3% e të rriturve në Suedi pinë duhan, duke përfshirë edhe emigrantët. Ndërsa, raportet tregojnë se njerëzit që emigruan nga vende të tjera evropiane janë tri herë më të prirur për të konsumuar duhan, krahasuar me suedezët e lindur në Suedi.
Një nga çelësat e suksesit të Suedisë është qasja e saj realiste dhe pragmatike në luftën kundër duhanit, që fokusohet në reduktimin e dëmit dhe jo ndalimin e përdorimit. Dr. Anders Milton, mjek dhe ish-president i Shoqatës Mjekësore Suedeze, shpjegon se Suedia ka ofruar një gamë të gjerë alternativash me rrezik të ulët, si snus, qeskat e nikotinës dhe produktet e ngrohjes, të cilat janë të disponueshme ligjërisht dhe të mbështetura nga reklamat edukative. Qeveria suedeze ka zbatuar gjithashtu një politikë taksimi që favorizon produktet pa tym, duke i bërë ato më të përballueshme se cigaret.
Si rezultat, Suedia ka arritur një nga normat më të ulëta të sëmundjeve të lidhura me duhanin në Bashkimin Evropian dhe një normë kancerogjene 41% më të ulët se shumë shtete të tjera evropiane.
“Smoke Free Sweden” është një fushatë që inkurajon vendet e tjera të ndjekin modelin suedez në luftën për reduktimin e dëmit nga duhani. Ky sukses është rezultat i një qasjeje të hapur dhe të mirëpritur për produktet alternative të nikotinës, duke e bërë Suedinë një model për shtetet që dëshirojnë të përmirësojnë shëndetin publik dhe të reduktojnë ndikimin e duhanit në shoqëri.
