Kina do të dërgojë dy foshnja panda në kopshtin zoologjik Smithsonian në Uashington. Këtë ka njoftuar kopshti zoologjik kombëtar i Kinës, disa muaj pasi tre panda gjigante u kthyen për shkak të tensioneve të rritura midis dy superfuqive globale. Njoftimi pasoi angazhimin e shtuar të Uashingtonit dhe Pekinit, të cilët arritën të vendosin lidhjet e ndërsjella në një bazë më të qëndrueshme që kur marrëdhëniet midis dy vendeve ranë në nivelin më të ulët historik vitin e kaluar. Njoftimi është një shenjë e qartë se Pekini miraton stabilizimin e lidhjeve me Uashingtonin.
Kopshti Zoologjik Kombëtar Smithsonian në Uashington ka njoftuar se pandat me emrin Bao Li dhe Mbreti Bao do të mbërrijnë atje nga Kina deri në fund të vitit. “Ne jemi të emocionuar të njoftojmë se kapitulli tjetër i partneritetit tonë në ruajtjen dhe mbarështimin e pandave fillon me pritjen e dy kafshëve të reja në Uashington,”-tha Brandy Smith, drejtor i Kopshtit Zoologjik Kombëtar Smithsonian dhe Institutit të Biologjisë së Konservimit.
Dërgimi i përkohshëm i pandave nga Kina në një vend tjetër në botë është një mënyrë e zakonshme për Kinën për të forcuar marrëdhëniet diplomatike me atë vend. Pas takimit me presidentin amerikan Joseph Biden në Kaliforni në nëntor, presidenti kinez Xi Jinping tregoi se ishte i hapur për të dërguar më shumë “të dërguar miqësie” në Shtetet e Bashkuara.
Shtetet e Bashkuara u shpërblyen me pandat e para pasi presidenti Richard Nixon normalizoi marrëdhëniet në vitin 1972 dhe pas vizitës së tij historike të Luftës së Ftohtë në Kinë, e ndjekur nga shumë vende të tjera. Rikujtojmë se ka ndërruar jetë në moshën 28-vjeçare panda gjigante më e vjetër japoneze, Tan Tan në kopshtin zoologjik Kobe, përpara një kthimi të planifikuar në Kinë që u vonua disa vite më parë për shkak të trajtimit mjekësor. Sipas agjencisë Kyodo, panda Tan Tan u soll nga Kina në kopshtin zoologjik Oji në vitin 2000 për të përmirësuar procesin e riprodhimit. Panda ishte planifikuar të kthehej në vendin e saj në korrik 2020, por udhëtimi i Tan Tan në Kinë u shty për shkak të pandemisë së koronavirusit.
