Shumë shpejt, forcat e Repartit të Operacioneve Speciale në Zall-Herr do të kenë qendrën multifunksionale, punimet për të cilën janë realizuar aktualisht në një pjesë të madhe, në masën 80%. Ministri i Mbrojtjes, Pirro Vengu, me Atasheun ushtarak amerikan në Shqipëri, Kapiten i rangut të II, Eric Cote inspektuan punimet që po kryhen në këtë godinë, ndërtimi i të cilës ka nisur në prill të vitit të kaluar dhe pritet të përfundojnë sipas planit, në qershor të vitit të ardhshëm.
Komandanti i ROS, nënkolonel Ajet Jata tregoi për detajet e këtij projekti. Ata vizituan edhe mjediset e palestrës e hambarit të skafeve, të cilat tashmë janë funksionale. Gjatë inspektimit, Vengu u shpreh se “Forcat Speciale janë kapacitet kombëtar dhe pesha e përgjegjësisë është më e madhe për t’u përballur me operacione mjaft specifike”.
Ju keni pasur një historik shumë të mirë nga pikëpamja e certifikimit të personelit sipas standardeve të NATO-s, madje edhe përtej pritshmërive kalendarike. Ne duhet që këtë përkushtim të personelit tuaj ta mbështesim jo vetëm nga pikëpamja e trajtimit në pagë e në vështirësi pune, jo vetëm në infrastrukturë, pasi investimet do të vazhdojnë këtu, por edhe sa i përket mjeteve të logjistikës që përdorin, u shpreh Vengu.
Reparti Operacioneve Speciale në Zall-Herr, prej disa vitesh i është nënshtruar rikonstruksionit me faza. Godina shumëfunksionale do të ketë një kapacitet për rreth 400 forcash speciale. Po ashtu, ajo do të ketë një poligon modern për kryerjen e qitjeve me armët e lehta.
Në këtë objekt janë parashikuar edhe ambiente, ku efektivët mund të kalojnë kohën e lirë. Kjo godinë do të ketë gjithashtu edhe një sallë të veçantë për komunikimin me NATO-n. Reparti i Operacioneve Speciale vazhdon stërvitjet intensive në kuadër të stërvitjes për vlerësimin kombëtar të “SOLTG” që do të zhvillohet në fillim të muajit tjetër, pra në tetor 2024.
