Policia e Shtetit publikoi masat e marra për mbarëvajtjen e protestës së thirrur sot në orën 20:00 para Kryeministrisë nga opozita. Mes tyre është dhe bllokimi i disa rrugëve duke nisur prej orës 18:00 e deri në mbyllje të tubimit. Në to, qytetarët duhet të shmangin lëvizjen me makina e të përdorin rrugë alternative.
Duke filluar nga ora 18:00 e deri në përfundim të tubimit, nuk do të lejohet qarkullimi i automjeteve, në bulevardin “Dëshmorët e Kombit”, sheshin “Nënë Tereza”, rrugën “Ismail Qemali”, kryqëzimin e Rrugës së Elbasanit me rrugën “Ibrahim Rugova”, rrugën “Papa Gjon Pali II”, bulevardin “Zhan D’Ark” dhe bulevardin “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
Policia u bën thirrje qytetarëve që të shmangin lëvizjen me automjete në këto akse rrugore dhe të përdorin rrugë alternative, për të mos penguar lëvizjen e lirë të pjesëmarrësve në tubim.
Nga ana tjetër, policia iu bën thirrje organizatorëve, drejtuesve, pjesëmarrësve në tubim, si dhe përfaqësuesve të subjekteve politike, që të ushtrojnë të drejtën e tyre në përputhje me Kushtetutën dhe legjislacionin në fuqi.
Policia e Tiranës u bën thirrje të gjithë pjesëmarrësve në tubim, që të distancohen nga çdo akt që cënon sigurinë e jetën e tyre, si dhe çdo akt dhune ndaj punonjësve të Policisë, përfaqësuesve të mediave apo vetë pjesëmarrësve, thuhet në deklaratën e Policisë.
Me moton: Sot vendosni ju, demokrati Luçiano Boçi shkruan:
Qytetare dhe qytetarë!
Të rinj e të reja!
Burra dhe gra të këtij vendi!
Ka ardhur dita!
Dita juaj, dita e zemërimit dhe revoltës.
Vendi ka kohë që është zhytur në shpopullim, kaos social, pasiguri ekonomike, korrupsion e drogë.
Kursi politik i mazhorancës dhe i arroganca e saj qeverisëse po eleminon liritë politike dhe standartet demokratike.
Drejtësia dhe shteti si kurrë më parë po përdoren si instrumenta e mekanizma për të luftuar dhe eleminuar çdo qëndrim e formacion opozitar.
Rama me projektin e tij për Narkodiktaturën, po e rrokullis me çmendurinë psiko-politike të tij, fatet tona e të familjeve tona në hone e katakombe pa kthim.
Është detyra juaj, detyra jonë t’i themi ndal dhe t’i sjellim shqiptarëve ndryshimin me zgjedhje të lira e të ndershme!
Zgjohuni dhe mendoni!
-47% e fëmijëve tanë janë të kequshqyer!
-100% e tyre janë të keqarsimuar!
-100% e tyre pa kujdesin e duhur shëndetësor!
-Shqipëria renditet e dyta për vdekshmërinë foshnjore!
-Shqipëria e fundit në renditjen e njohurive arsimore për 15-vjeçarët
-Shqipëria e fundit për cilësinë e Arsimit të lartë!
-1.000.000 shiptarë janë larguar
-Shqipëria me numrin më të vogël të mjekëve për banorë!
-Shqipëria me bujqësinë më të prapambetur e të pambështetur në Europë!
-Me mijëra biznese të falimentura!
-Me të ardhura mesatare më të ultat në Europë!
-Me çmime sa Europa!
-Me naftën më të shtrenjtë në Europë!
-Me pagën minimale më të ulët në Europë!
-Me pensionet më diskriminuese në Europë!
-Me 35% të popullsisë që jeton me 5 dollarë në ditë!
-Me vlerësimin më të ulët për mjekë e mësuesë!
-Me taksat më të larta e me tarifa marramendëse!
Shqiptarë bashkohuni me ne për ta përmbysyr të keqen që ka pushtuar këtë vend!
-Me bandë politike e banda të krimit të organizuar që qeverisin!
-Me korrupsion galopant e hajdutëri të pashoqe pronash e fondesh!
-Me arrogancë, dhunë politike, ekonomike e sociale!
-Me pabarazi ekstreme dhe paligjëshmëri të shndërruar në ligj!
-Me Drejtësi armike të drejtësisë dhe së vërtetës!
Ngrihuni dhe revoltohuni bashkë me ne!
Shpëtoni të ardhmen!
Për familjet tuaja, fëmijët tuaj, fatet tuaja, territoret tuaja, vendin tonë, atdheun tonë!
Sot vendosni ju!
Para Kryeministrisë, ora 20.00!!!!
