Këngëtari i njohur Slimane, përfaqësuesi i Francës në Eurovizion vitin e kaluar, është nën hetim për një akuzë ngacmimi seksual të ngritur nga një ish-teknik i tij. Sipas raportimeve në mediat franceze, padi zyrtare është bërë për një incident që supozohet të ketë ndodhur në dhjetor të kaluar, gjatë një koncerti në Zénith në Saint-Étienne.
Prokurori i Saint-Étienne, David Charmage, ka konfirmuar se avokati i paditësit pritet të paraqesë prova shtesë në lidhje me rastin. Në ankesë, thuhet se Slimane ka tentuar të përqafojë teknikun dhe i ka bërë komente të papërshtatshme për seks. Pas refuzimit të teknikut, ai vazhdoi t’i dërgonte mesazhe dhe video të papërshtatshme për disa orë.
Slimane ka nisur turneun “Cupidon” në nëntor 2023, një vit pas publikimit të albumit të tij “Chroniques d’un cupidon” në shtator 2022. Turneu është ende në vazhdim dhe pritet të përfundojë në janar 2025 në Paris. Koncerti i tij i radhës do të mbahet më 8 nëntor në Tours.
