Ankthi është një emocion normal që përjetojmë të gjithë në situata të ndryshme, por ndonjëherë mund të ndihet i pakontrollueshëm. Psikologia britanike Kirren Schnack ofron disa strategji për të ndihmuar në menaxhimin e ankthit:
Përqafojeni veten
Shtrëngoni veten fort me krahë për rreth një minutë. Kjo mund të ndihmojë në qetësimin e emocioneve të trazuar.
Këndoni ose gumëzhini
Këndimi ose gumëzhitja për disa minuta mund të ndihmojë për të reduktuar stresin. Një studim i vitit 2023 sugjeron se gumëzhitja stimulon nervin vagus, i cili ndihmon në rregullimin e humorit.
Numëroni mbrapsht
Numëroni ngadalë dhe mbrapsht nga 100 në një. Kjo ju ndihmon të përqendroheni në frymëmarrjen tuaj.
Masazhoni zonën e nofullës
Masazhi i lehtë nën nofullën tuaj për një minutë mund të lehtësojë tensionin muskulor.
Kryeni ushtrime fizike
Bëni tre grupe ushtrimesh me 10 ulje-ngritje, kërcime ose vrapim në vend. Aktiviteti fizik ndihmon në çlirimin e endorfinës dhe reduktimin e ankthit.
Merrni frymë ngadalë dhe thellë
Merrni frymë nëpërmjet hundës, mbani frymën për pesë sekonda dhe nxirrni përmes gojës. Kjo ndihmon në qetësimin e trupit dhe mendjes.
Freskoni fytyrën me ujë të ftohtë
Larja e fytyrës me ujë të ftohtë stimilon nervin vagus dhe ndihmon në shpërqendrim.
Përsërisni fraza qetësuese
Përsërisni fraza si “Unë jam i sigurt, i qetë!” edhe nëse nuk e besoni plotësisht. Kjo mund të ndihmojë në rritjen e vetëbesimit.
Relaksoni muskujt
Praktikoni relaksimin progresiv të muskujve, duke filluar nga gishtat e këmbëve dhe duke shkuar deri në fytyrë. Kjo ndihmon në lehtësimin e tensionit dhe pagjumësisë.
Konsultohuni me një specialist
Nëse ankthi vazhdon, është e rëndësishme të flisni me një profesionist për ndihmë të mëtejshme.
Këto teknika të thjeshta mund të ndihmojnë në menaxhimin e ankthit dhe në përmirësimin e mirëqenies emocionale.