Kur fëmija yt fillon të të bëjë shumë pyetje, mos u shqetëso! Kjo është një fazë normale dhe e rëndësishme në zhvillimin e tij, por ndonjëherë mund të të bëjë të ndihesh i/e mbingarkuar. Kur fëmija të pyet: “Pse qielli është blu?” ose “Pse njerëzit flenë?”, është e rëndësishme që përgjigjet të jenë sa më të thjeshta dhe të kuptueshme. Fëmijët kanë nevojë për sqarime të thjeshta, pasi konceptet e ndërlikuara mund t’i ngatërrojnë. Një mënyrë tjetër për ta kaluar më lehtë këtë fazë është duke e bërë procesin argëtues dhe ndërveprues. Kjo mënyrë e bën fëmijën të ndihet më i përfshirë dhe ndihmon në zhvillimin e mendimit kritik.
Gjithashtu, krijon mundësi për biseda më të gjata dhe të thella me fëmijën tënd. Ki parasysh se shumë nga këto “pse” janë të lidhura me kureshtjen e tyre të natyrshme. Duke dëgjuar me vëmendje, jo vetëm që ndihmon fëmijën të mësojë më shumë, por gjithashtu i jep atij një ndjenjë sigurie dhe vlerësimi. Jo gjithmonë do të kesh një përgjigje të gatshme dhe kjo është në rregull. Nëse të pyet diçka që nuk e di, thjesht mund të thuash: “Nuk e di, le të kërkojmë bashkë përgjigjen.” Kjo i mëson fëmijës se të mësuarit është një proces i vazhdueshëm dhe se të kërkosh informacione është pjesë e rritjes.
Faza e “pse-ve” është gjithashtu një mundësi e shkëlqyer për të përdorur imagjinatën. Jo çdo përgjigje ka një shpjegim të thjeshtë. Për disa pyetje më të ndërlikuara është e rëndësishme të fillosh me një përgjigje bazë dhe ta thellosh më tej ndërsa fëmija rritet. Mësoje gradualisht dhe lejoje të eksplorojë botën në mënyrën e vet. Kjo fazë tregon që fëmija yt po zhvillohet dhe po zbulon dalëngadalë botën që e rrethon.
