Ekzema, e njohur gjithashtu si dermatiti, është një çrregullim i zakonshëm i lëkurës që shkakton skuqje, kruarje dhe shfaqje të lëkurës së thatë dhe të irrituar. Ky shqetësim mund të ndikojë ndjeshëm në cilësinë e jetës, duke shkaktuar mjaft shqetësime për ata që e përjetojnë. Simptomat e ekzemës mund të përfshijnë njolla të lëkurës me luspa, gunga të vogla dhe kruarje të fortë, dhe mund të përhapen në zona të ndryshme të trupit. Shpesh, këto simptoma janë të lidhura me ndryshimet në kushte atmosferike, sidomos gjatë stinës së dimrit, kur temperaturat ekstreme ndikojnë direkt në shëndetin e lëkurës.
Dimri mund të përkeqësojë ndjeshëm simptomat e ekzemës. Lëkura, si pjesa më e ndjeshme e trupit ndaj kushteve të jashtme, reagon menjëherë ndaj ndryshimeve të temperaturës, veçanërisht kur kaloni nga një ambient i ngrohtë në një të ftohtë dhe anasjelltas. Ky ndryshim shpejt mund të shkaktojë irritim dhe përkeqësim të simptomave ekzistuese. Për më tepër, dimri sjell me vete edhe probleme të tjera për ata që vuajnë nga ekzema, si ekspozimi ndaj pluhurit dhe kushteve të thata të ajrit.
Ambientet e mbyllura dhe të paajrosura si dhe përdorimi i ngrohësve mund të rrisin më tej problemet me lëkurën, pasi ato shkaktojnë tharje të ajrit dhe të lëkurës. Mungesa e vitaminës D gjatë dimrit gjithashtu është lidhur me përkeqësimin e ekzemës, pasi ky vitamin ka një rol të rëndësishëm në forcimin e funksionit të lëkurës dhe sistemit imunitar. Gjithashtu, ndjeshmëria ndaj infeksioneve të ftohjes dhe gripit mund të shkaktojë inflamacion dhe të ndihmojë në acarimin e dermatitit.
Për të mbrojtur lëkurën tuaj gjatë muajve të ftohtë dhe për të parandaluar përkeqësimin e ekzemës, është e rëndësishme të ndiqni disa masa të kujdesit:
Mbani një temperaturë të qëndrueshme në shtëpi– Shmangni mbinxehjen e dhomave dhe sigurohuni që ajri të ketë lagështi të mjaftueshme. Përdorimi i paisjeve që mbajnë lagështirën në parametrat e duhur është i rëndësishëm.
Përdorni ujë të vakët për dushin – Uji i nxehtë mund të irritojë lëkurën dhe të shkaktojë tharje të tepërt, ndaj është më mirë të përdorni ujë të vakët dhe të shmangni dushin e gjatë.
Vishni rroba të buta dhe të përshtatshme – Rrobat e bëra nga materiali natyral si pambuku dhe mëndafshi janë më të mira për lëkurën tuaj, pasi ato ndihmojnë në ruajtjen e lagështisë dhe parandalojnë acarimin. Mundohuni të vishni disa shtresa rrobash për t’u mbrojtur nga të ftohtët pa acaruar lëkurën.
Kujdes me ngrohësit e ambientit – Ngrohësit e ambientit mund të shkaktojnë tharjen e ajrit dhe lëkurës, ndaj duhet të përdorni lagështues ajri ose t’i kontrolloni kushtet e lagështirës në shtëpi.
Kujdes nga pluhuri dhe ndotësit – Gjatë dimrit, pluhuri dhe ndotësit në ajër mund të përkeqësojnë ekzemën. Përdorni pastrues ajri dhe sigurohuni që dhomat të jenë të pastra dhe të ajrosura siç duhet.
Konsultohuni me mjekun – Nëse simptomat e ekzemës përkeqësohen gjatë dimrit, është e rëndësishme të kërkoni këshilla profesionale për trajtime dhe menaxhim të simptomave.
Ekzema është një gjendje e lëkurës që kërkon kujdes të vazhdueshëm, sidomos në stinën e dimrit, kur ndryshimet e temperaturës dhe kushtet atmosferike mund të përkeqësojnë simptomat. Duke marrë masa të thjeshta si përdorimi i ujit të vakët, veshja e materialeve natyrale dhe mbajtja e lagështisë në nivel të duhur, mund të menaxhoni më mirë këtë gjendje dhe të mbani lëkurën tuaj të shëndetshme gjatë dimrit.
