Celebrities Gossip Showbiz

Shuhet njerka e Maddona-s, këngëtarja nuk e pranoi kurrë si anëtare të familjes!

Joan Ciccone, njerka e Madonnas, ka ndërruar jetë pas një beteje të gjatë me një formë agresive të kancerit, në moshën 81-vjeçare. Në njoftimin mortor thuhej se ajo do t’u mungojë pafundësisht familjes dhe miqve të cilëve u zbukuroi jetën me entuziazmin, gëzimin dhe dashurinë e saj. Madonna ende nuk ka reaguar publikisht për këtë ngjarje. Joan u martua me babain e Madonna-s, Silvio Tony Ciccone, në vitin 1966 dhe së bashku rritën gjashtë fëmijët e tij nga martesa e parë me ish-bashkëshorten, e cila gjithashtu quhej Madonna.

Nëna biologjike e këngëtares, Madonna Fortin, vdiq në vitin 1963 nga kanceri i gjirit, kur Madonna ishte vetëm pesë vjeçe. Raportohet se Madonna dhe Joan nuk kishin një marrëdhënie të mirë. Në vitin 2002, këngëtarja ka deklaruar se marrëdhënia e tyre ishte e vështirë dhe pranoi se nuk e kishte pranuar Joan ndërsa po rritej. Ajo gjithashtu përmendi se herë pas here kishte vuajtur për shkak të momenteve të kaosit në shtëpinë e tyre.

“Nëna ime vdiq kur isha fëmijë, gjë që ishte shumë e vështirë për mua. Duke reflektuar mbrapa, mendoj se edhe për të ishte e vështirë. Unë isha shumë e lidhur me babain dhe nuk doja të pranoja ndryshimin në jetën time”-tha Madonna asokohe. Rikujtojmë, se vitin tjetër nisin xhirimet e një filmi të ri për yllin e muzikës pop, Madonna.

Si regjisore dhe bashkë-skenariste, këngëtarja punoi për vite me radhë për filmin, i cili u shpall për herë të parë në vitin 2020, por ajo i shtyu xhirimet për shkak të turneut. Tashmë mediat britanike po shkruajnë se ylli ka zgjedhur edhe një aktore për ta portretizuar. Po flasim për Julia Garner, e njohur më së shumti për rolin e saj si Ruth Langmore në serialin dramatik të krimit të Netflix “Ozark”.

Aktorja u përfshi për herë të parë në projekt në vitin 2022, pasi iu nënshtrua një audicioni rraskapitës 11-orësh. Ndër aktoret që ishin kandidate për këtë rol janë Sydney Sweeney, Florence Pugh dhe Emma Laird. Madonna përfundoi performancën në Brazil muajin e kaluar dhe tani po fokusohet në xhirimet e një filmi biografik.