Nëna e balerinës Michaela DePrince, e cila u nda nga jeta në moshën 29-vjeçare, ka ndërruar jetë një ditë pas vdekjes së vajzës së saj. Elaine DePrince vdiq më 11 shtator në moshën 77-vjeçare. E ndjera kishte shumë vite që luftonte me një sëmundje të trashëguar dhe ajo nuk e dinte që vajza e saj e ndjerë Michaela kishte vdekur kur shkoi për të bërë operacionin.
Jessica Volinski, një zëdhënëse e familjes DePrince me anë të një deklarate tha se:
Ka shumë spekulime në internet, kështu që familja dëshiron të sqarojë zyrtarisht disa gjëra. Ditët e fundit kanë qenë edhe më të vështira nga sa e kuptojnë shumica, pasi familjes i është dashur të përballet edhe me vdekjen e njerkës së Michaela, Elaine. Elaine vdiq gjatë një procedure rutinë në përgatitje për operacionin dhe ajo nuk e dinte për vdekjen e Michaela në momentin e operacionit… Sado e pabesueshme të duket, dy vdekjet nuk kanë lidhje. I vetmi kuptim që mund të gjesh në këtë situatë absurde është se Elaine, e cila tashmë kishte humbur tre fëmijë shumë vite më parë, u kursye me ndihmën e Zotit në dhimbjen e humbjes së një fëmijës së saj të katërt. Ajo që po kalon familja tani është e paimagjinueshme dhe e dhimbshme. Është tragjike të humbasësh dy anëtarë të familjes brenda 24 orëve. Ne vazhdojmë të kërkojmë respekt për privatësinë tonë dhe ju inkurajojmë të raportoni këdo që shpërndan dezinformata dhe spekulime në këtë postim.
Ndërkaq, DePrince, e lindur si Mabinty Mangura në Sierra Leone, bëri emër duke kapërcyer një fëmijëri të mbushur me sfida dhe duke u bërë një kërcimtare e klasit botëror. Ajo kaloi vitet e para të jetës së saj në një jetimore ku përjetoi kushte të vështira dhe keqtrajtim, përpara se të birësohej nga një çift amerikan në moshën 4-vjeçare.
