Ka ndërruar jetë në moshën 72-vjeçare aktori i njohur Robbie Coltrane, i cili luajti personazhin e Hagrid në filmat e “Harry Potter”. Ai gjithashtu u shfaq në dramën detektive të ITV “Cracker” dhe filmat e James Bond “Goldeneye” dhe “The World Is Not Enough”.
Në një deklaratë të bërë për mediat, agjentja e tij Belinda Wright konfirmoi se aktori ndërroi jetë në një spital pranë Falkirk në Skoci. Ajo e përshkroi Coltrane si një talent unik, duke shtuar se roli i tij si Hagrid u solli gëzim fëmijëve dhe të rriturve njësoj në të gjithë botën.
Për mua personalisht do ta kujtoj atë si një klient besnik. Përveçse ishte një aktor i mrekullueshëm, ai ishte inteligjent, shumë i zgjuar dhe pas 40 vitesh që me krenari quhesha agjentja e tij, do të më mungojë.
Karriera e aktorit filloi në vitin 1979 në serialin televiziv “Play for Today”, por ai u bë i njohur në “A Kick Up the Eighties”, një serial komedi televiziv i BBC-së, ku luajtën gjithashtu Tracey Ullman, Miriam Margoles dhe Rik Mayall. Ai gjithashtu u shfaq në komedinë e ITV të vitit 1983 “Alfresco”, me Stephen Fry, Emma Thompson, Siobhan Redmond dhe Hugh Laurie.
Deri në vitin 1987 ai pati një rol kryesor në “Tutti Frutti”, që bënte fjalë për grupin skocez të rock-ut “The Majestics”, në të cilin luajti gjithashtu Emma Thompson dhe Richard Wilson. Coltrane la pas vetes fëmijët e tij Spencer dhe Alice dhe nënën e tyre Rhona Gemmell dhe motrën e tij Annie Rae.
