Partia e ekstremit të djathtë, Alternativa për Gjermaninë (AfD), shënoi rezultate historike në zgjedhjet rajonale të një dite më parë. Rezultatet paraprake i dhanë fitore të qartë në Turingia, ndërsa doli e dyta, me diferencë të ngushtë në Saksoni. Fitorja në Turingia është e parë në zgjedhje e një partie të ekstremit të djathtë që nga mposhtja e Gjermanisë Naziste në Luftën e Dytë Botërore.
Në Saksoni, kristian-demokratët e qendrës së djathtë (CDU) siguruan një epërsi të vogël mbi AfD-në, po sipas rezultateve paraprake nga zyra elektorale. Rezultatet e zgjedhjeve dhe bisedimet pasuese të koalicionit do të vendosin balancën e pushtetit në parlamentet shtetërore në Turingia e Saksoni. Secili prej tyre ka pushtet të konsiderueshëm mbi çështjet rajonale.
Ndërkohë, tre partitë në qeverinë e koalicionit kombëtar të kancelarit gjerman Olaf Scholz, u përballën me një mbrëmje të errët me humbje pothuajse kudo. Rezultatet paraprake nga komisioni zgjedhor e vendosin AfD-në në 32,8% të votave në Turingia. Kjo i dha partisë një epërsi të qartë ndaj CDU-së, e cila grumbulloi 23,6%.
Megjithatë, kandidati kryesor i CDU-së në Turingia, Mario Voigt, pretendoi një mandat për të formuar qeverinë e ardhshme në këtë land. Voigt tha se rezultatet e zgjedhjeve kërkonin ndryshime politike në land, i cili është qeverisur nga një koalicion i krahut të majtë të udhëhequr nga Bodo Ramelow i partisë së majtë “Die Linke” (“E Majta”).
Rezultatet paraprake treguan se CDU-ja siguroi një fitore të ngushtë ndaj AfD në Saksoni. Pas numërimit të të gjitha votave, CDU-ja siguroi 31,9% të votave, pak përpara AfD që mori 30,6%. BSW mori 11,8%, ndërsa SPD fitoi 7,3%.
Të Gjelbrit siguruan 5,1% të votave, ndërsa partia “Die Linke” ra në 4,5%, por do të rikthehet në parlamentin e landit, pasi fitoi dy mandate të drejtpërdrejta.
