Sekretari i përgjithshëm i Kombeve të Bashkuara, António Guterres shprehu shqetësimin se “paligjshmëria totale” në Rripin e Gazës po pengon shpërndarjen e ndihmave humanitare në rajonin e izoluar bregdetar.
Guterres vuri në dukje se brenda Gazës, “paligjshmëria është totale”, duke e bërë jashtëzakonisht sfiduese shpërndarjen e ndihmave brenda zonës. Zyrtari i lartë theksoi se grabitja e ndihmave dhe kamionëve po e ndërlikonte procesin e shpërndarjes.
Duhet të ekzistojë një mekanizëm që garanton se ekziston një minimum i ligjit dhe rendit që lejon që shpërndarja të bëhet, kërkoi Guterres.
Guterres rinovoi thirrjen e tij për një armëpushim të menjëhershëm midis Izraelit dhe Hamasit. Lufta e Gazës u shkaktua nga masakra e më shumë se 1 mijë e 200 njerëzve nga Hamasi dhe grupet aleate me të në Izrael, më 7 tetor të vitit të kaluar.
Sipas autoritetit shëndetësor të kontrolluar nga Hamasi në Gaza, të paktën 37 mijë e 431 njerëz janë vrarë dhe 85 mijë 653 janë plagosur në Gaza që nga fillimi i luftës. Shifrat nuk bëjnë dallim mes civilëve dhe luftëtarëve dhe nuk mund të verifikohen në mënyrë të pavarur.
Të paktën 25 palestinezë u vranë dhe 50 të tjerë u plagosën kur forcat izraelite bombarduan tendat ku strehohen njerëz të zhvendosur në zonën Al-Mawasi në perëndim të qytetit Rafah, në jug të Rripit të Gazës. Në një deklaratë, Ministria e Shëndetësisë në Gaza njoftoi se numri i atyre që humbën jetën nga sulmi izraelit në tendat në zonën Al-Mawasi u rrit në 25, me 50 të tjerë të plagosur.
Më herët, burime mjekësore i thanë agjencisë Anadolu se ekipet e shpëtimit gjetën trupat e 18 viktimave dhe ofruan trajtime për 35 persona të plagosur pasi tanket izraelite shënjestruan kampin e njerëzve të zhvendosur.
Gjysmëhëna e Kuqe Palestineze konfirmoi sulmin në një deklaratë, duke vënë në dukje se ekipet e saj mjekësore “po trajtojnë një numër të madh viktimash pas bombardimeve izraelite në zonë”.
