Kancelari gjerman Olaf Scholz vlerësoi zëvendëspresidenten e SHBA-së Kamala Harris si një politikane “kompetente dhe me përvojë” që mund të fitonte fare mirë zgjedhjet në SHBA. Megjithatë ai nuk shprehu hapur një mbështetje ndaj saj kundrejt Donald Trump.
Shumë politikanë gjermanë kanë frikë se Trump mund të vendosë tarifa më të larta për importet nëse ai kthehet dhe ata kanë ngritur pikëpyetje në lidhje me mbështetjen e SHBA-së për aleancën ushtarake të NATO-s.
Gjermania ishte shpesh në qendër të zemërimit të Trump gjatë mandatit të tij të parë për shkak të suficitit tregtar me Shtetet e Bashkuara dhe shpenzimeve të ulëta për mbrojtjen. Megjithatë, Berlini vitet e fundit ka rritur shpenzimet e tij për mbrojtjen.
“Fushata zgjedhore në SHBA sigurisht që do të jetë emocionuese, tani me një formacion paksa të ri dhe një plejadë të re,” tha Scholz në konferencë vjetore për shtyp të verës të mërkurën.
“Unë mendoj se është shumë e mundur që Kamala Harris të fitojë zgjedhjet, por janë votuesit amerikanë ata që do të vendosin.”
Scholz shtoi se e kishte takuar Harrisin disa herë.
“Kjo është një politikane kompetente dhe me përvojë që e di saktësisht se çfarë po bën,” tha ai. “Ajo e di se çfarë dëshiron dhe çfarë mund të bëjë.”
I pyetur nëse do të zgjidhte rrugën e Biden, duke hequr dorë nga kandidimi për një mandat të dytë, Scholz tha me humor “faleminderit për pyetjen shumë të këndshme dhe miqësore”.
“Dhe jo, SPD është një parti shumë e bashkuar. Ne të gjithë jemi të vendosur të shkojmë së bashku në fushatën e ardhshme zgjedhore të përgjithshme dhe të fitojmë. Dhe unë do të kandidoj si kancelar për t’u bërë sërish kancelar”- tha ai.
Scholz, 66 vjeç, ka parë që popullariteti i tij personal, së bashku me atë të koalicionit të tij, të bjerë që nga marrja e detyrës në fund të vitit 2021. Sondazhet shpesh e vendosin atë pas liderit të konservatorëve të opozitës.