Një artist i ri dhe shumë i talentuar ju bashkua studios së “Live From Tirana” në këtë të mërkurë artistike. Bëhet fjalë për Sardi Strugaj i cili sot ‘zbërtheu’ për të gjithë dëgjuesit, projektet e tij më të bukura muzikore duke treguar prapaskena dhe se si këto këngë janë realizuar.
Ai numëron një sërë këngësh që janë kthyer në hite menjëherë pas publikimit dhe megjithëse është shumë kritik ndaj vetes kur thotë se për disa prej tyre është penduar, ne nuk mendojmë kështu. Sardi gjatë intervistës së sotme konfirmoi se shumë shpejt do të kemi 2 prurje të reja prej tij.
Përkatësisht, bëhet fjalë për një këngë solo dhe një bashkëpunim muzikor, ndoshta sërish krah Arnon. Sigurisht ky lajm na gëzon të gjithëve sidomos adhuruesve të muzikës së tij. Kujtojmë se Sardi dhe Arnon janë bërë bashkë për hitin e padiskutueshëm muzikor “E Pash Unë Djallin”.
