Rruga e lashtë Via Appia në Romë, është përfshirë sot në trashëgiminë botërore të UNESCO, duke u bërë objekti i 60 në këtë listë i Italisë. Rruga 800 km me kalldrëmin e lashtë, e njohur dhe si “Mbretëresha e Rrugëve”, është më e vjetra dhe nga më të rëndësishmet e ndërtuara nga mjeshtrit romakë duke nisur nga viti 312 p.e.s.
Rruga Apiane besohet se shënoi asokohe një revolucion në ndërtimin e kalimeve tregtare duke bërë lidhjen e Romës me pjesën jugore të gadishullit italian. Korridori strategjik siguronte kalimin në të gjitha kushtet e motit duke ndihmuar legjionet romake të kalonin shpejt dhe të pasfiduar për objektivat e tyre, shkruan rrjeti Yahoo.com. Në deklaratën e UNESCO thuhej:
Fillimisht ishte konceptuar si kalim për objektivat ushtarake, për të avancuar drejt Azisë së Vogël nga lindja, por ajo ishte një lidhje që ndikoi në rritjen e qyteteve, duke lehtësuar këmbimet bujqësore, kulturore e tregtare.
Rruga përbëhet nga 22 pjesë dhe ilustron aftësitë e avancuara teknike të inxhinierëve romakë të projekteve të infrastrukturës, ashtu si në punimet e tyre të tharjes së tokave dhe ngritjes së strukturave monumentale. Sot rruga e lashtë Via Appia është jo vetëm një muzeum i hapur që prej viteve 1800, por dhe një zonë gjigante gjelbërimi, ku romanët dhe turistët kalojnë kohën e lirë me ecje, me biçikleta ose duke vizituar atraksione të tjera përgjatë saj.
