Rritja e nivelit të Oqeanit Paqësor ka tejkaluar mesataren globale, e cila kërcënon disa shtete ishullore, sipas një raporti të Organizatës Botërore Meteorologjike (WMO). Në raport thuhet se niveli i ujit po rritet sepse temperaturat e larta të shkaktuara nga djegia e vazhdueshme e lëndëve djegëse fosile po shkrin akullnajat.
“Aktivitetet njerëzore kanë dobësuar kapacitetin e oqeanit për të na mbajtur dhe me rritjen e niveleve, oqeani po bëhet një kërcënim në rritje”-tha Sekretarja e Përgjithshme e WMO, Celeste Saulo. Rritja e niveleve të oqeaneve ka çuar tashmë në një rritje të shpeshtësisë së përmbytjeve, e cila është veçanërisht e zakonshme në ishujt si Ishujt Kuk dhe Polinezia Franceze.
Rreth 34 fatkeqësi natyrore si stuhitë dhe përmbytjet u raportuan në rajonin e Paqësorit në vitin 2023, duke rezultuar në më shumë se 200 vdekje, thuhet në raportin e WMO, duke shtuar se vetëm një e treta e shteteve të vogla ishullore kanë sisteme paralajmërimi të hershëm. Saulo vuri në dukje se ndikimi i rritjes së nivelit të ujit në ishujt e Paqësorit është në mënyrë disproporcionale i lartë, pasi lartësia mesatare e tyre është vetëm një ose dy metër mbi nivelin e detit.
Sekretari i Përgjithshëm i Kombeve të Bashkuara, António Guterres ka thënë se njerëzit kanë përgjegjësi për të ulur emetimet ose rrezikojnë një katastrofë në mbarë botën. “Paqësori është sot zona më e cënueshme e botës”-i tha ai BBC-së në Takimin e Liderëve të Forumit të Ishullit të Paqësorit në Tonga. “Ka një padrejtësi të madhe në lidhje me Paqësorin dhe kjo është arsyeja pse jam këtu.”
“Ishujt e vegjël nuk kontribuojnë në ndryshimin e klimës, por gjithçka që ndodh për shkak të ndryshimeve klimatike shumëfishohet këtu”. Por përfundimisht “detet në rritje po vijnë për të gjithë ne,” paralajmëroi ai në një fjalim në forum, ndërsa OKB-ja paraqiti dy raporte të veçanta mbi rritjen e nivelit të detit dhe se si ato kërcënojnë kombet ishullore të Paqësorit.
