Kryeministri Edi Rama, ka replikuar me ndjekësit në rrjetë sociale, pasi këto të fundit i janë drejtuar lidhur me rritjen e çmimeve në vend, konkretisht për naftën.
Kryeministri është pyetur se si ka mundësi që edhe pse çmimi i naftës po rritet , nuk ka asnjë reagim dhe se vetë kryeministri nuk është i shqetësuar për këtë fakt.
Por në përgjigjen e tij Rama është shprehur se sharjet nuk janë argumente dhe se për rritjen e çmimit të naftës, Rama shprehet se tashmë secili e ka idenë se në çfarë kohe po jetohet, ndërsa shtron pyetjen se çfarë lidhje ka Rusia me çmimet e energjisë dhe naftës?
Ndërkaq Kreu i Partisë Demokratike, Lulzim Basha këtë të shtunë nga një pikë karburanti në vend i bëri thirrje qeverisë shqiptare të ndërhyjë menjëherë dhe të ulë çmimin e naftës dhe benzinës për t’iu ardhur në ndihmë qytetarëve shqiptarë.
Përmes një videomesazhi, duke drejtuar gishtin nga çmimi i naftës dhe benzinës në vend, Basha, i bëri thirrje qeverisë shqiptare që të marrë masat për të hequr taksën e qarkullimit Rama mbi karburantin, 240 lekë për liter.
“Siç e shikoni çmimi i naftës ka arritur në 230 lekë të reja për litër, 2 mijë e 300 lekë për litër. I bëj një thirrje të përsëritur qeverisë të marrë masa duke hequr taksën e qarkullimit Rama mbi karburantin, 240 lekë për litër dhe duke marrë masa të tjera shtesë për të stabilizuar në këto ditë të vështira çmimin e karburantit i cili ka një efekt të drejtpërdrejtë në mallrat dhe shërbimet bazë për të gjithë qytetarët”, tha Basha.
Sipas tij, është detyra e qeverisë shqiptare t’ju vijë në ndihmë njerëzve dhe bizneseve në këto kohë të vështira, duke shtuar më tej se qeveria shqiptare i ka të gjitha mundësitë, duke ulur taksën që t’ju vijë në ndihmë njerëzve në nevojë, në mënyrë që të paguajnë më pak për karburantin.
“Të paguani më pak për mallrat e tjera dhe shërbimet e tjera bazë, çmimi i të cilave ndikohet drejtpërdrejt dhe rritet nga çmimi i karburantit. Ndaj e përsëris thirrjen që qeveria t’ju vijë në ndihmë njerëzve duke bërë të mundur që çmimi i karburantit të mbahet nën kontroll përmes uljes së taksave që ndikojnë tek çmimet”, u shpreh kryeopozitari.
