“Kur planifikoni pushime në plazh, shumica prej jush mendojnë për destinacionet tropikale si Karaibet dhe Greqinë, ndërsa disa nga plazhet më të mira në botë shpesh anashkalohen”, shkruan Angelica Tobit në revistën amerikane të udhëtimeve “Islands”. Sipas një studimi, vendi europian, Shqipëria, po cilësohet si shtëpia e plazhit më të kaltër në botë.
Agjencia britanike e udhëtimeve “CV Villas” kreu një studim, duke mbledhur qindra pamje të pandryshuara të Google Maps-it dhe duke krahasuar nuancat e blusë në imazhe me “YInMn Blue”, një nuancë e njohur nga shkencëtarët si bluja më e pastër dhe më e shndritshme.
Plazhi Pasqyrave, ky plazh evropian në Rivierën Shqiptare sfidoi destinacionet ikonë tropikale duke u shpallur si më i kaltri në botë. Riviera Shqiptare shtrihet në 215 milje të vijës bregdetare të thyer, përballë deteve Adriatik dhe Jon. Ky i fundit është veçanërisht i famshëm për ngjyrën dhe bukurinë e spikatur blu.
Në fakt, Plazhi Pasqyrave ka marrë emrin e tij nga mënyra se si uji shkëlqen dhe i verbon shikuesit në rrezet e diellit. Bregdeti i Adriatikut është i mbushur me plazhe të shumta si Plazhi Pasqyrave që presin për t’u eksploruar dhe duke e bërë atë një vizitë të domosdoshme për të apasionuarit pas plazhit në Evropë.
“Travel Off Path” ndau një koment rreth Plazhit të Pasqyrave:
Unë e kam dashur Plazhin e Pasqyrave që nga dita e parë që kam vendosur këmbët atje. Ishte viti 2013 kur vizitova Shqipërinë dhe Plazhi i Pasqyrave ishte plazhi i parë që vizitova. Kishte shtretër prej druri dhe çadra kashte. Deti ishte i pastër si kristal me guralecë dhe unë pagova vetëm rreth 7 dollarë për një shezllon. Ky është një çmim i shkëlqyer për të paguar në një plazh që ndihet si parajsa juaj tropikale. Vërtetë, ai çmim ka shkuar deri në 20 dollarë tani, por nuk kanë ndryshuar shumë gjëra.
Cilat janë pritshmëritë në plazhin më blu në botë?
Vendndodhja e largët e Plazhit të Pasqyrave e bën opsion ideal udhëtimi ditor për ata që kërkojnë të përjetojnë disa nga plazhet më të mira dhe më të bukura në Rivierën Shqiptare. Ujërat blu dhe vija bregdetare mahnitëse janë atraksionet kryesore në Plazhin e Pasqyrave, duke e bërë një vend të qetë për t’u çlodhur.
Ata që duan të eksplorojnë më tej përgjatë vijës bregdetare piktoreske mund të ndjekin rrugën për rreth 1 milje deri te Plazhi i Pulëbardhës, një tjetër plazh i mrekullueshëm që ka ujëra të ngjashme bruz.
Këshilla gjatë vizitës në Plazhin e Pasqyrave
Bregdeti shqiptar është i popullarizuar për pushuesit për shkak të klimës mesdhetare, verës së nxehtë, të thatë dhe dimrit të butë. Piku i sezonit përfshin muajt nga qershori deri në shtator kur moti është ideal për plazhistët.
Saranda ose Ksamili janë të dyja lehtësisht të arritshme nga plazhi. Ju mund të merrni një autobus nga Saranda për në Butrint që niset çdo orë ose të bëni një udhëtim me taksi 25 minuta nga Saranda apo 15 minuta me taksi nga Ksamili.
Shqipëria jo vetëm që zë vendin e parë në betejën për ujërat më të kaltra duke mposhtur vendet si Maldivet por konsiderohet edhe si një nga destinacionet më të përballueshme të udhëtimit në Evropë.
Kjo do të thotë që ju mund të shijoni disa nga plazhet më piktoreskë të kontinentit, me një buxhet të vogël.
