Presidenti rus, Vladimir Putin vuri në dukje se do të hakmerret ndaj kujtdo që tenton të përçajë shoqërinë ruse, teksa vlerësoi lart efikasitetin dhe besnikërinë e agjencive të zbatimit të ligjit të shtetit të tij, Rusisë. Siç dihet, shefi i Kremlinit akuzohet gjerësisht se ka përshkallëzuar shtypjen e shoqërisë civile, mediave të pavarura dhe opozitës, teksa po vazhdon ofensivën e tij ushtarake në Ukrainë. Kundërshtarët dhe kritikët e Kremlinit ndiqen penalisht e dënohen me burgime të gjata.
Ata që përpiqen të frikësojnë njerëzit, të përçajnë shoqërinë tonë, të luajnë me ndjenjat fetare apo kombëtare, nuk do të kenë kurrë sukses, u shpreh Putin përmes një video-mesazhi të publikuar nga Kremlini më herët gjatë ditës. Ata i pret një hakmarrje e pashmangshme, shtoi ai.
Rusia rregullisht përdor shprehje të tilla si “spiunë perëndimorë” dhe “kukulla të Perëndimit”, për të përshkruar ata që kundërshtojnë Kremlinin, përfshirë kritikët në vend e që i sheh të lidhur e të mbështetur nga figura perëndimore.
Kremlini publikoi këtë video të presidentit Putin për të shënuar “Ditën e hetuesve” dhe lideri rus nderoi agjenci të ndryshme të zbatimit të ligjit, përfshirë Komitetin Hetues dhe shërbimin e sigurisë, FSB, që është pasardhës i KGB-së të kohës sovjetike.
Hetuesit tregojnë besnikëri pa kushte për Atdheun dhe popullin tonë, u shpreh Vladimir Putin.
Kritikët e Kremlinit thonë se fokusi i Rusisë në hetimin dhe ndjekjen penale të kundërshtarëve politikë brenda vendit e bën shtetin të pambrojtur nga kërcënimet reale të sigurisë. Pothuajse të gjithë kundërshtarët kryesorë të liderit rus janë në burg apo janë larguar në emigracion nisur nga presioni i lartë.
Për të shtypur kritikat, Rusia aplikon dënime të ashpra për ata që kritikojnë veprimet ushtarake në Ukrainë. Kjo në kohën kur vazhdimisht Putin ka pretenduar se shoqëria ruse është e bashkuar sa i përket pushtimit rus të Ukrainës, të nisur në shkurt të vitit 2022 e që vijon prej mbi dy vitesh.
