Vendin e parë këtë javë në Timeless Playlist e mban artisti Adam Lambert, i cili me projektet e tij ka arritur të spikasë gjithmonë. Edhe pse ka kohë që i ka publikuar, ai mbetet një artist që do të pëlqehet gjithmonë për rrymën e tij dhe me shumë siguri do të vazhdojë t’i mbijetojë kohës. “Holding Out For A Hero” është një këngë mjaft e veçantë e publikuar së fundmi, e cila pritet të jetë pjesë e albumit të tij më të ri.
Adele është një tjetër artiste që mbetet sërish në listën tonë, por këtë radhë ka bërë një hyrje të re me projektin e saj “Easy On Me”. Kjo këngë dhe mesazhi që ajo përcjell nëpërmjet saj kanë një fuqi të jashtëzakonshme, që kanë bërë të mundur prekjen e shpirtrave të shumë njerëzve, ku çdo person i mundshëm ka gjetur të paktën një herë veten e tyre në vargjet e kësaj kënge.
Michael Jackson është gjithashtu pjesë e kësaj liste për këtë javë, i cili renditet me këngën e tij ikonike “The Way You Make Me Feel”. Projektet e tij janë padyshim të përjetshme dhe të pavdekshme edhe pse ka shumë kohë që janë publikuar. Energjia që e karakterizon dhe zëri i veçantë i tij kanë krijuar një kryevepër, e cila me tingujt e saj sjell vetëm poztivitet kudo që dëgjohet.
