Përdoruesit e telefonave celularë të Gjermanisë po “shfletojnë” gjithnjë e më shumë përmes 5G. Sipas operatorit të rrjetit Vodafone, pothuajse 20 për qind e të gjithë trafikut të të dhënave në rrjetin e tij u transmetua duke përdorur këtë teknologji në tetor. Një vit më parë, proporcioni kishte qenë rreth 10 për qind dhe dy vjet më parë 5 për qind kështu që çdo vit ka parë një dyfishim.
Konkurrentja Telefónica Deutschland (O2) gjithashtu raporton një pjesë dukshëm më të lartë të 5G, e cila gjithashtu u dyfishua brenda një viti. Por kompania nuk ka dhënë një shifër specifike për këtë. “5G tani ka mbërritur në jetën e përditshme të përdoruesve të telefonave inteligjentë”, thotë Shefi i Teknologjisë në O2, Mallik Rao. “Veçanërisht në qytetet e mëdha gjermane, 5G është tani një shtyllë kryesore e rrjeteve dixhitale për konsumatorët”.
Kur vjen puna te shpejtësia e internetit, ka disa të dhëna që flasin për shpejtësinë që ofrojnë 5G dhe Starlink. Starlink supozohet se ofron shpejtësi nga 50 deri në 250 Mbps, me ndonjëherë edhe më shumë, që mund të ndryshojë në varësi të ngarkesës së rrjetit dhe motit. Ndërsa rrjetet 5G mund të ofrojnë shpejtësi mesatare shkarkimi midis 50 Mbps dhe 1 Gbps, ose edhe më shumë në disa raste. Kështu, shpejtësia e 5G zakonisht është më e lartë se ajo e Starlink, por varet nga infrastruktura në zonë.
Në këtë drejtim, Starlink vlerësohet si më i përshtatshëm për zonat rurale ose ato ku nuk ka mbulim të mirë të 5G, duke qenë se përdor satelitë dhe nuk ka nevojë për “infrastrukturë tokësore”. Në anën tjetër, 5G është ideal për zonat urbane dhe suburbane ku ka mbulim të mirë të rrjetit. Si konkluzion, në zonat me mbulim të mirë, 5G mund të ofrojë internet më të shpejtë dhe më të qëndrueshëm sesa Starlink. Megjithatë, në zonat rurale ose ku mungon infrastruktura e 5G, Starlink vlerësohet si një alternativë më e mirë sesa opsionet e tjera.
