Në muajin gusht të këtij viti, Spencer Elden, i cili u fotografua lakuriq në kopertinën e albumit të “Nirvana”, kur ishte foshnjë, e paditi grupin, duke pretenduar se ai ishte “shfrytëzuar seksualisht” si i mitur. Lidhur me këtë Dave Grohl ka folur së fundmi pasi ai dhe shokët e tij të grupit “Nirvana” u paditën për shfrytëzimin e dyshuar seksual të një të mituri në kopertinën e albumit të tyre të titulluar “Nevermind”. Elden ishte 4 muajsh kur u fotografua lakuriq nga një mik i familjes për kopertinën e albumit. Fotografia e shfaq atë nën ujë në një pishinë me krahët e shtrirë, duke kapur një kartëmonedhë dollari që po varet para tij nga një grep peshkimi.
Në dokumentet ligjore të marra nga “Variety”, Elden pretendoi se identiteti i tij i vërtetë dhe emri ligjor janë të lidhura përgjithmonë me shfrytëzimin seksual që ai përjetoi si i mitur, imazh i cili është shpërndarë dhe shitur në mbarë botën që nga koha kur ishte foshnjë e deri në ditët e sotme. 30-vjeçari pretendon se ai ka pësuar një numër të konsiderueshëm dëmesh gjatë gjithë jetës si rezultat i kësaj fotografie, duke përfshirë shqetësime ekstreme dhe të përhershme emocionale, ndërhyrje në zhvillimin e tij normal dhe përparimin arsimor dhe probleme mjekësore dhe psikologjike që kërkonin mjekim.
Padia gjithashtu deklaron pretendimin se “Nirvana” me qëllim tregtoi pornografinë e Spencer dhe shfrytëzoi natyrën tronditëse të imazhit të tij për të promovuar veten dhe muzikën e tyre. Si rezultat, Elden po kërkon 150,000 dollarë dëmshpërblim nga secili prej 15 të pandehurve. Këto përfshijnë anëtarët e grupit, Dave Grohl dhe Krist Novoselic, ish-bashkëshortja e Kurt Cobain, Courtney Love, menaxherët e pasurisë së Cobain, fotografi Kirk Weddle dhe drejtorin artistik Robert Fisher.
Tani, një intervistë e re me Dave Grohl shënon herën e parë që ndonjë nga anëtarët e grupit i është drejtuar publikisht padisë. Duke folur për “Sunday Times” gjatë fundjavës, anëtari i grupit “Nirvana” la të kuptohej se ka plane për të ndryshuar kopertinën e albumit përpara 30-vjetorit të tij të ardhshëm. Ai shprehet:
Unë kam shumë ide se si duhet ta ndryshojmë atë kopertinë, por do të shohim se çfarë do të ndodhë. Ne do t’ju njoftojmë. Jam i sigurt se do të dalim me diçka të mirë.
Që kur u ngrit padia në muajin gusht, grupi ka njoftuar planet për të nxjerrë një botim special të “Nevermind” për të shënuar 30-vjetorin e tij. Porositë për ribotimin janë aktualisht në dispozicion në faqen e internetit të “Nirvana”, megjithëse imazhi i Elden mbetet i pacensuruar. Kjo vjen pasi Maggie Mabie, një avokate për Elden, i tha “Associated Press” se ylli i kopertinës dëshiron që vepra e artit të censurohet për çdo publikim të ardhshëm, duke shpjeguar se:
Nëse ka një ribotim të 30-vjetorit, ai dëshiron që e gjithë bota të mos shohë organet e tij gjenitale.
Kur u nxit të komentojë vetë padinë, Grohl tha se ai për fat të mirë nuk duhet të merret me dokumentet.
Unë mendoj se ka shumë më tepër për të pritur dhe shumë më tepër për jetën sesa të futesh në gjëra të tilla.
Xhirimi origjinal i kopertinës erdhi kur Kirk Weddle, fotografi, i kontaktoi miqtë e tij për t’i pyetur nëse ai mund të fotografonte djalin e tyre ndërsa ai ishte duke punuar në veprat e artit dhe pavarësisht se kopertina ishte xhiruar nga një mik i prindërve të Elden, dokumentet ligjore pretendojnë se familja kurrë nuk nënshkroi një njoftim që autorizonte përdorimin e imazhit të djalit të tyre.
Duke diskutuar për veprat e famshme të artit në 2008, babai i Elden, Rick Elden, i tha NPR se atij iu ofruan 200 dollarë për xhirimin, i cili thuhet se zgjati rreth 15 sekonda. Ai pretendoi se e kishte harruar foton deri kur tre muaj më vonë, pa fotografinë e kopertinës në murin e “Tower Records” në Sunset Boulevard në Los Angeles. Tre dekada që nga publikimi i tij, albumi ka shitur mbi 30 milionë kopje në të gjithë botën, dhe Elden ka rikrijuar kopertinën duke veshur mbathje noti disa herë për të shënuar përvjetorët e tij të 10-të, 20-të dhe 25-të. Dhe ndërsa aktualisht mbetet të shihet nëse grupi do të bëjë apo jo ndryshime në kopertinë për ribotimin e tij muajin e ardhshëm, diçka na tregon se ylli i tij origjinal i kopertinës nuk do të rikrijojë veprat e artit këtë herë.
