Aeroplanmbajtësja amerikane mbërrin në Korenë e Jugut ndërsa pakti i mbrojtjes Rusi-Kore e Veriut thellon frikën rajonale.
Një aeroplanmbajtëse e Marinës së Shteteve të Bashkuara ka mbërritur në Korenë e Jugut për një shfaqje force, ndërsa Uashingtoni, Seuli dhe Tokio lëshuan një deklaratë të përbashkët të hënën duke dënuar thellimin e lidhjeve ushtarake midis Koresë së Veriut dhe Rusisë.
“USS Theodore Roosevelt” me energji bërthamore u ankorua në portin e Busan të shtunën përpara stërvitjeve trepalëshe me Korenë e Jugut dhe Japoninë në ujërat pranë gadishullit.
Stërvitjet “Freedom Edge” nisën pas një marrëveshjeje të bërë nga shefat e mbrojtjes të SHBA-së, Koresë së Jugut dhe Japonisë përpara se lideri rus Vladimir Putin të bënte udhëtimin e tij në Phenian javën e kaluar. Por deklarata e fortw, e përbashkët, e formuluar nga tre partnerët, e lëshuar të hënën, tregon gravitetin me të cilin ata e shohin një “partneritet strategjik” të ri midis Koresë së Veriut dhe Rusisë, të bërë gjatë udhëtimit të Putinit.
Përveç nënshkrimit të marrëveshjes së mbrojtjes me Kim Jong Un, Putin gjithashtu lidhi sigurinë në Gadishullin Korean me pushtimin rus të Ukrainës, duke kërcënuar se do të armatoste Korenë e Veriut nëse Koreja e Jugut ofron ndihmë ushtarake për Kievin.
SHBA, Koreja e Jugut dhe Japonia “dënojnë në termat më të fortë të mundshëm thellimin e bashkëpunimit ushtarak midis DPRK dhe Rusisë”, thuhet në deklaratën e përbashkët, duke përdorur akronimin për Republikën Popullore Demokratike të Koresë, emri zyrtar i Koresë së Veriut.
Marrëdhëniet e thelluara midis Moskës dhe Phenianit dhe pakti i mbrojtjes së ndërsjellë “duhet të jetë një shqetësim i madh për këdo që është i interesuar në ruajtjen e paqes dhe stabilitetit në Gadishullin Korean, duke mbështetur regjimin global të mospërhapjes dhe duke mbështetur popullin e Ukrainës ndërsa ata mbrojnë lirinë dhe pavarësinë e tyre kundër agresionit brutal të Rusisë”, thuhet në deklaratë.
Deklarata e përbashkët vjen pasi të tre partnerët shprehën veçmas shqetësime të thella mbi traktatin, duke përfshirë Korenë e Jugut që e dënoi atë dhe thirri ambasadorin e Rusisë të premten, një hap i rrallë diplomatik që ilustron tensionet e përkeqësuara midis Seulit dhe Moskës.
Prania e aeroplanmbajtëses në Busan është vetëm e fundit në një seri lëvizjesh ushtarake amerikane për të treguar përkushtimin “e hekurt” të Uashingtonit ndaj aleatit të tij, Korenë e Jugut.
Në fillim të këtij muaji, bombarduesit B-1B të Forcave Ajrore të SHBA-së morën pjesë në një stërvitje në gadishull, hera e parë në shtatë vjet që ata avionë sulmues me rreze të gjatë kanë hedhur municione të drejtpërdrejta në Korenë e Jugut.
Dhe javën e kaluar, një anije luftarake e Forcave Ajrore të SHBA-së AC-130 kreu gjithashtu sulme të drejtpërdrejta në të njëjtin poligon ku B-1 hodhën bombat e tyre. Stërvitjet e përbashkëta me SHBA-në kanë qenë prej kohësh një burim zhgënjimi dhe zemërimi për Korenë e Veriut, e cila ka ecur përpara me programin e saj të paligjshëm të armëve bërthamore dhe testimin e raketave nën Kim, i cili ka gjetur një kauzë të përbashkët me Putinin.
Rusia, e cila dikur mbështeti sanksionet ndaj Koresë së Veriut, përdori të drejtën e vetos në Kombet e Bashkuara në fillim të këtij viti për të mbrojtur Phenianin nga shqyrtimi i mëtejshëm dhe Putini ka mbështetur shpesh narrativën e Kim-it.
