Një orë xhepi ari që i përkiste kapitenit të anijes “Carpathia”, i cili shpëtoi 700 të mbijetuar nga katastrofa e Titanikut, u shit në ankand për gati 2 milionë dollarë, duke vendosur një rekord të ri për artikujt që lidhen me tragjedinë e njohur.
Ora 18 karatëshe, e markës Tiffany & Co., iu dhurua kapitenit Arthur Rostron nga tre gra të mbijetuara të Titanikut si shenjë mirënjohjeje për shpëtimin e tyre. Ajo u ankandua nga një shtëpi ankandi në Wiltshire, Angli, dhe u ble nga një koleksionist amerikan.
Kjo shumë, 2 milionë dollarë, është më e madhja e paguar ndonjëherë për një artikull që ka lidhje me Titanikun, duke thyer rekordin e mëparshëm që u vendos në prill të këtij viti. Në atë periudhë, një orë xhepi ari që i përkiste John Jacob Astor, një nga pasagjerët më të pasur të Titanikut, u shit për 1,175 milionë funte (rreth 1.4 milionë euro). Astor, i cili ishte 47 vjeç kur vdiq gjatë mbytjes së anijes, është një nga figurat më të njohura të tragjedisë.
Vlera e orës së kapitenit Rostron thekson jo vetëm rëndësinë historike të ngjarjeve të vitit 1912, por edhe interesin e vazhdueshëm të koleksionistëve për objekte që lidhen me këtë tragjedi që mori jetën e qindra pasagjerëve, përfshirë disa nga njerëzit më të pasur të kohës.
